Atyraýda ańshynyń ólimine qatysty qylmystyq is toqtatyldy

ATYRAÝ.KAZINFORM — Atyraýda 2025 jyldyń 14 jeltoqsan kúni dostarymen ańǵa shyǵyp, 5 kúnnen keıin múrdesi tabylǵan 61 jastaǵy Ótebaı Sabırovtiń ólimine qatysty qylmystyq is toqtaldy. 

Atyraý oblystyq PD baspasóz qyzmeti bergen málimetke súıensek, 1964 jyly týǵan er adamnyń máıiti zorlyq-zombylyq belgilerinsiz tabylǵan.

— Osy derek boıynsha qylmystyq is qozǵaldy. Oqıǵaǵa baılanysty jedel-tergeý is-sharalarynyń kesheni júrgizildi. Tergeý sharalarynyń nátıjesinde qylmystyq quqyq buzýshylyq quramynyń bolmaýyna baılanysty qylmystyq is toqtatyldy. Bul sheshim prokýratýramen bekitildi, — dep málimdedi PD baspasóz qyzmeti.

Eske salaıyq, marqum 14 jeltoqsan kúni qasyndaǵy birneshe azamatpen ańshylyqqa shyǵyp ketken. Bir táýlikten keıin zeınetkerdiń dostary onyń ań aýlap jatqanda joǵalyp ketti dep otbasyna habarlaǵan.

15 jeltoqsanda saǵat 23:00–de Atyraý oblysy TJD Jedel basqarý ortalyǵyna habarlama túsken. Aqparat túsken sátten bastap izdestirý-qutqarý jumystary uıymdastyryldy.

TJD kúshteri men quraldary, QR QM 99245 áskerı bóliminiń jeke quramy, polıtsııa departamentiniń qyzmetkerleri jáne týystarynan jalpy 100 adam, 21 tehnıka, 2 kınologııalyq eseptop izdestirý jumysyna jumyldyrylǵan edi.