Atyraýda «Ańsaǵan sábı» baǵdarlamasy arqyly 500-ge jýyq áıel ana atandy

ATYRAÝ. KAZINFORM — Atyraý oblysynda 2021–2025 jyldar aralyǵynda «Ańsaǵan sábı» memlekettik baǵdarlamasy aıasynda ekstrakorporaldy uryqtandyrý (EKU) protsedýrasy arqyly 500-ge jýyq áıel bosanyp, sábı súıý armany oryndalǵan.

Baǵdarlama bedeýlik dıagnozy qoıylǵan erli-zaıyptylarǵa joǵary tehnologııalyq medıtsınalyq kómektiń qoljetimdiligin qamtamasyz etip, óńirdiń demografııalyq áleýetin arttyrýǵa múmkindik beredi.

Oblystyq densaýlyq saqtaý basqarmasynyń aqparatyna súıensek, bul baǵdarlamanyń kómegimen 2021 jyly 154, 2022 jyly 131 áıel ana atanǵan. Al 2023 jyly 98, 2024 jyly 84 kelinshek bosanǵan.

2025 jyly «Ańsaǵan sábı» baǵdarlamasy aıasynda EKU protsedýrasynan ótken 44 áıel júktilikke qol jetkizgen. Qazirgi tańda olardyń basym bóligi júktilikti baqylaý jáne medıtsınalyq súıemeldeý kezeńinde.

Mamandardyń aıtýynsha, aldaǵy aılarda bul kórsetkish naqty bosaný nátıjesimen tolyqtyrylmaq.

Densaýlyq saqtaý salasynyń ókilderi baǵdarlamanyń tıimdiligi jyl saıyn dáleldenip kele jatqanyn atap ótedi. EKU tehnologııasynyń qoljetimdi bolýy kóptegen otbasylarǵa qarjylyq aýyrtpalyqsyz zamanaýı medıtsınalyq kómek alýǵa múmkindik berdi.

Osyǵan deıin Atyraýda salmaǵy 5,8 keli bolǵan alyp bala dúnıege kelgenin habarlaǵan edik.