Atyraýda alǵash ret naýqastyń ót jolyn keńeıtý otasy jasaldy

ATYRAÝ. KAZINFORM – Atyraý oblystyq aýrýhanasynyń dárigerleri alǵash ret ót jolyn keńeıtý otasy jasaýdy qolǵa aldy. 

Atyraý oblystyq Densaýlyq saqtaý basqarmasy baspasóz qyzmetiniń aqparatyna qaraǵanda, 51 jastaǵy naýqasqa «Dekompensatsııa satysyndaǵy jalpy ót jolynyń tómengi úshten bir bóliginiń stenozy» dıagnozy qoıylǵan. Bul otany oblystyq aýrýhananyń úsh dárigeri – hırýrg Amanqos Qýanyshov, endoskopıst Arman Alıev pen ÝDZ dárigeri Janar Qaıdar jasaǵan.

– Naýqasqa shuǵyl túrde Teri, baýyr arqyly baýyrdan tys ót joldaryn nıtılondy stentpen endoskopııalyq súıemeldeýmen endobıllıarly stentteý» boıynsha medıtsınalyq kómek kórsetildi. Naqtylaı aıtatyn bolsaq, tolyqqandy ót as qorytý júıesine túspegeni anyqtaldy. Sol sebepten naýqastyń ót jolyn keńeıtip, arnaıy stend saldyq. Mundaı operatsııa Atyraý oblysynda alǵash ret jasalyp otyr. Ota sátti jasaldy. Naýqastyń otadan keıingi jaǵdaıy baqylaýǵa alyndy. Onyń jaǵdaıy birqalypty, ómirine tónip turǵan qaýip joq, - deıdi dáriger Amanqos Qýanyshov.

Dárigerdiń pikirinshe, osy kezge deıin mundaı kúrdeli ota Almaty qalasyndaǵy A.N.Syzǵanov atyndaǵy Ulttyq ǵylymı hırýrgııa ortalyǵynda jasatý úshin joldama berilip kelgen. Al bıyl jyl basynan beri oblystyq aýrýhananyń hırýrgııa bólimshesinde shuǵyl jáne josparly túrde 6181 ota jasalǵan.

Eske sala ketelik, budan buryn Atyraýda alǵash ret 14 jasar qyzǵa bet-jaq transplantatsııasy jasalǵanyn jazǵan bolatynbyz.