Atyraýda alǵash ret er adamnan mıkro-TESE operatsııasy arqyly uryq alyndy

ATYRAÝ.KAZINFORM — Óńirde alǵash ret azoospermııa dıagnozy qoıylǵan naýqasqa mıkrohırýrgııalyq mıkro-TESE operatsııasy jasaldy. Bul týraly densaýlyq saqtaý basqarmasy habarlady.

Azoospermııa — erlerdiń reprodýktıvtik qabiletine asa aýyr áser etetin patologııalardyń biri. Mundaı jaǵdaıda spermatozoıdtar múlde bolmaıdy, sondyqtan dástúrli joldarmen uryqtandyrý qarastyrylady. Mıkro-TESE ádisi — zamanaýı mıkroskopııalyq tehnologııalardy paıdalanyp, atalyq bezdiń tinderinen mınımaldy zaqym keltirip spermatozoıdtardy anyqtaýǵa múmkindigin beretin eń tıimdi hırýrgııalyq tásil. Bul protsedýra keıinnen ekstrakorporaldy uryqtandyrý (EKO) baǵdarlamasynda qoldanylady .

«Operatsııa joǵary tehnologııalyq mıkroskopııalyq jabdyq kómegimen júrgizilip, barlyq kezeńi kásibı sheberlikpen sátti aıaqtaldy. Alynǵan materıal EKO protsesinde qoldanýǵa daıyn. Bul — Atyraý oblysynda mıkro-TESE ádisimen jasalǵan alǵashqy ota, jáne óńirdiń reprodýktıvtik medıtsına salasynyń jańa damý kezeńiniń bastamasy bolyp otyr. Aldaǵy ýaqytta osy ınnovatsııalyq tásil aımaqtaǵy kóp azamatqa ata-ana baqytyn syılaýǵa múmkindik beredi dep kútilýde», - delingen resmı málimdemede.

Aıta keteıik, bul otany Atyraý oblystyq aýrýhanasynyń ýrolog-androlog dárigeri Dýlat Bekqalıev jasady.

Eske salaıyq, osyǵan deıin SQO-da keıingi tórt jylda «Ańsaǵan sábımen» 334 bala ómirge kelgenin jazǵan edik.