Atyraýda áleýmettik ortalyqtar 384 mln teńgeni tıimsiz josparlaǵan
ATYRAÝ. KAZINFORM – Atyraý oblysyndaǵy arnaýly áleýmettik qyzmet kórsetý ortalyqtarynda júrgizilgen memlekettik aýdıt nátıjesinde 415,6 mln teńgege jýyq buzýshylyq anyqtaldy. Tekserý kezinde qyzmetkerlerdiń jalaqysyn artyq nemese kem esepteý, qarjylyq eseptilikti burmalaý, syıaqylardy negizsiz tóleý derekteri tirkelgen.
Tekseris nátıjesinde belgili bolǵan qarjy buzýshylyqtar 29 mıllıonǵa jýyqtaıdy. 384 mıllıon teńge tıimsiz josparlansa, 2,4 mln teńge tıimsiz paıdalanǵan.
Sonymen qatar mamandardyń biliktiligin arttyrý sharalary ýaqytyly júrgizilmegeni, dári-dármek tapshylyǵy, qoımalardyń talapqa saı kelmeýi, bıýdjet qarajatyna satyp alynǵan jabdyqtardyń paıdalanýǵa berilmegeni anyqtaldy. Aýdıt Atyraý oblysy jumyspen qamtýdy úılestirý jáne áleýmettik baǵdarlamalar basqarmasyna qarasty Saraıshyq jáne Qulsary júıke-nevrologııalyq ınternat-úılerin, psıhonevrologııalyq aýytqýy bar múgedek balalarǵa arnalǵan ınternatty, qarttar men múgedekterge arnalǵan oblystyq ınternat úıin, sondaı-aq oblystyq múgedekterdi saýyqtyrý ortalyǵynyń 2022, 2023 jáne 2024 jyldaǵy jumysyn qamtydy.
– Tórt ortalyqqa tıisti nusqamalar, al basqarmaǵa usynystar joldanady. Osyndaı buzýshylyqtarǵa jol bergen laýazymdy tulǵalar tártiptik jaýapkershilikke tartylyp, aldaǵy ýaqytqa profılaktıkalyq sharalar qabyldanady. Búginde atalǵan buzýshylyqtardyń 75,6 paıyzy qalpyna keltirildi, - dedi Atyraý oblysy boıynsha tekserý komıssııasynyń múshesi Bolat Anjanov.
Aýdıtorlar ketken olqylyqtar men zańbuzýshylyqtardyń birqataryna toqtaldy. Mysaly, №1 arnaýly áleýmettik qyzmetter kórsetý ortalyǵy 2024 jyly tártiptik jazasy bar qyzmetkerlerge 319 myń teńge syıaqy tólegen. Al №2 arnaýly áleýmettik qyzmet kórsetý ortalyǵy sol jyly óz esebinde turmaǵan obektilerdi kútip ustaýǵa 825 myń teńge jumsap, qazynadaǵy qarjyny tıimsiz paıdalanǵan.
Atalǵan mekemelerge jetekshilik etetin Atyraý oblysy jumyspen qamtýdy úılestirý jáne áleýmettik baǵdarlamalar basqarmasynyń basshysy Polymbet Hasanov aldaǵy ýaqytta júıeli jumys júrgizýge ýáde berdi. Sonymen qatar tekserý barysynda ortalyqtardyń materıaldyq-tehnıkalyq jaǵdaıyna da basa nazar aýdaryldy. Ásirese keıbir mekemelerde keı jabdyqtardyń 100 paıyzǵa deıin tozǵany belgili boldy.
Tekseris nátıjesinde QR Eńbek kodeksi, sanıtarııalyq-epıdemıologııalyq salamattylyq salasyndaǵy zańnamany jáne dárilik zattar men medıtsınalyq buıymdardyń normatıvtik qujattarda belgilengen talaptardy buzýdyń 13 faktisi tirkelip, ortalyqtarǵa 1,1 mln teńgeden astam aıyppul salynǵan.
Eske salaıyq byltyr eldegi 32 aýdıt nátıjesi boıynsha 200-den astam sheneýnik jazalanǵanyn habarlaǵan edik.