Atyraýda alaıaqtyqqa baılanysty 300-ge jýyq qylmystyq is sotqa joldanǵan

ATYRAÝ. KAZINFORM – Atyraýda jyl basynan beri alaıaqtyqqa baılanysty 300-ge jýyq qylmystyq is tergelip, sotqa joldanǵan.

Atyraý qalalyq polıtsııa basqarmasy tergeý bólimi bastyǵynyń orynbasary Aıbek Násıevtiń deregine qaraǵanda, alaıaqtardyń zańsyz áreketinen 200-ge jýyq adam aldanǵan.

«Tergeý kezinde alaıaqtyq qylmystyq quqyq buzýshylyqtyń birneshe túri anyqtalyp otyr. Birinshiden, alaıaqtar arzan baǵaǵa memlekettik baǵdarlamalar arqyly kópqabatty úılerden páter men jer telimderin alyp berýdi usynady. Ekinshiden, memlekettik emes jeke kásiptik uıymdarǵa, onyń ishinde munaı óndirý kompanııalaryna, merdigerlik mekemelerine jumysqa ornalastyrýǵa ýáde beredi. Úshinshiden, zeınetaqy qorynda jınalǵan qarjyny alyp berý týraly usynyspen shyǵady. Tórtinshiden, memleketten sýbsıdııa alý maqsatynda «Damý» qory arqyly qomaqty nesıe alyp berýge sendiredi. Osyndaı alaıaqtyq quqyq buzýshylyqqa qatysty 300-ge jýyq qylmystyq is sotqa joldandy. Atyraý qalasy men ózge óńirlerdiń 200-ge jýyq turǵyny alaıaqtardyń qurbany boldy», - dep habarlady Aıbek Násıev.

Onyń aıtýynsha, turǵyndar alaqtardyń arbaýyna túspeý úshin birneshe keńesti eskerýge tıis.
Birinshiden, joǵaryda kórsetilgen syltaýlarmen aqsha suraǵan beıtanys adamdardyń bankttik esep shottaryna qarjy aýdarmaǵan jón.

Ekinshiden, ǵalamtor jelisindegi jarnamalardy aldymen tekserip, zańdylyǵyna kóz jetkizý kerek. 

Úshinshiden, elimizde jumysqa ornalastyratyn resmı organdar azamattardan aqsha almaıtynyn udaıy jadyda ustaý qajet. 

Eske sala ketelik, budan buryn alaıaqtar habarlasqanda ne isteý kerektigi jazylǵan bolatyn.