Atyraýda alaıaqtyq jasaǵan bloger men onyń dosy bas bostandyǵynan aıyryldy

ATYRAÝ. KAZINFORM – Atyraý soty bloger men onyń dosyn alaıaqtyq babymen kináli dep tanydy. Sot úkimimen bloger 6,5 jylǵa, al, dosy 5,5 jylǵa sottaldy.

Atyraý qalasyndaǵy №2 sottyń málimetine qaraǵanda, alaıaqtyq kúdigine ilingen sottalýshylarǵa QR Qylmystyq kodeksiniń 190-babynyń 4-bóliginiń 2-tarmaǵymen aıyp taǵylǵan.

– 2024 jylǵy 4 naýryz ben 12 sáýir aralyǵynda Atyraý qalasynda bloger N. jáne onyń dosy S. ınvestıtsııa arqyly tabys tabýǵa bolady degen syltaýmen tanysy Sh.-ny mobıldi qosymsha arqyly qomaqty qarjy aýdarýǵa kóndirgen. Qurbylar aqsha salý arqyly úlken paıda tabýǵa bolatynyn aıtyp, Sh.-ny ártúrli datada túrli somada aýdarymdar jasaýǵa úgittegen. Uzaq ýaqyt boıy N. jáne S. jábirlenýshimen baılanysyn jalǵastyryp, jasandy túrde ınvestıtsııalardyń sáttiligi týraly ıllıýzııa jasaǵan, -dep habarlady atalǵan sottan.

Al, jábirlenýshi Sh. jyldam qarjylyq tabystan úmittenip, 33 mln teńgeden astam aqsha aýdarǵan. Sondaı-aq, ártúrli bankten nesıe alyp, óziniń altyn buıymdary men premıým klasstaǵy kólikterin kepilge qoıǵan. Alaıda, jábirlenýshi ýáde etilgen paıdany ala almaǵan.

– N. jáne S.-nyń qylmystyq áreketteriniń saldarynan jábirlenýshi Sh.-ǵa jalpy somasy 33 mln 300 myń teńge kóleminde materıaldyq shyǵyn keltirilgen. Sonymen qatar, S. jáne N. ózderine alǵan mindettemelerin oryndamaıtynyn bile tura, aldaý jolymen gúl satatyn kompanııalarynyń ókilderin tólem jasamaı, olarǵa gúl berýge ıtermelegen. N. gúldi alǵannan keıin Instagram jelisindegi paraqshasyna júktep, «Mıster H»-ten syılyq ekenin kórsetken. Olardyń qylmystyq áreketteriniń nátıjesinde gúl dúkenderiniń ıelerine – jábirlenýshi Z.-ǵa 634 myń teńge, al, jábirlenýshi A.-ǵa 3 mln 354 myń teńge materıaldyq shyǵyn keltirilgen. Jábirlenýshilerge keltirilgen zalal ótelmegen, - dep málim etti №2 sottan.

Aıyptalýshylardyń alaıaqtyq áreketteri is materıaldarymen, jábirlenýshiler men kýálardyń aıǵaqtarymen, geolokatsııa derekterimen, banktik aýdarymdar týraly málimettermen, tergeý áreketteriniń hattamalarymen jáne aıǵaq zattarmen dáleldengen. Sot S. men N.-nyń jasaǵan isine ókingenin, jas balasynyń baryn jazany jeńildetetin mán-jaılar retinde tanydy. Jazany aýyrlatatyn mán-jaılar anyqtalmaǵan.

– Sot úkimimen aıyptalýshylar aıyp taǵylǵan bappen kináli dep tanyldy. S.-ǵa 5 jyl 6 aı, N.-ǵa 6 jyl 6 aı merzimge bas bostandyǵynan aıyrý jazasy taǵaıyndaldy, -dep naqtylady sottan.

Sot úkimi zańdy kúshine engen joq.

Eske sala ketelik, budan buryn Atyraýda kásipkerden 2 mln teńge bopsalaǵan eki kúdikti qamaýǵa alynǵanyn jazǵan bolatynbyz.