Atyraýda «Aqjaıyq» tabıǵı rezervatynyń aýmaǵynda qamys janyp jatyr
ATYRAÝ. KAZINFORM – Atyraýda «Aqjaıyq» tabıǵı rezervatynyń aýmaǵynda qamys janyp jatyr. Qazir munaıly shaharda ystyń ıisi qatty sezilip tur.
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 9 qazanda tabıǵı rezervattyń aýmaǵyndaǵy qamys órti anyqtalǵan.
«Atyraý qalasynyń mańyndaǵy Erkinqala aýylynan 40 shaqyrym qashyqtyqta, Kaspıı teńiziniń jaǵalaýyndaǵy «Aqjaıyq» memlekettik tabıǵı rezervatynyń aýmaǵynda qamys byqsyp jatyr. Qamys órtin sóndirýge tótenshe jaǵdaılar departamenti men «Aqjaıyq» memlekettik tabıǵı rezervatynan 46 qyzmetker, 16 tehnıka tartyldy. Qarańǵy túsýine baılanys órtti sóndirý jumysy ýaqytsha toqtatyldy», -dep habarlady departamenttiń qoǵammen baılanys toby.
Rezervat aýmaǵyndaǵy qamys órtin sóndirý, erteń, 10 qazan qaıta jalǵasady.
«Qamys órtinen eldi mekenderge tónip turǵan qaýip joq. Jalyn sharpyǵan aýmaq qamys órti tolyq sóndirilgen soń anyqtalady. Ony arnaıy komıssııa músheleri anyqtaıtyn bolady», -dep málim etti departamenttiń qoǵammen baılanys tobynan.
Eske sala ketelik, buǵan deıin Kaspıı teńiziniń jaǵalaýyndaǵy 5 gektar aýmaqta qamys órtenip jatqanyn habarlaǵan edik.
Al, keshe Kaspıı jaǵalaýyndaǵy qamys órtin sóndirýge tikushaqpen 30 tonna sý tógilgenin jazǵan bolatynbyz.
