Atyraýda «Aqjaıyq» tabıǵı rezervatyndaǵy órtke tikushaqpen 100 tonna sý tógildi

ATYRAÝ. KAZINFORM – Atyraý oblysynda «Aqjaıyq» memlekettik tabıǵı rezervat aýmaǵynyń 800 gektaryn órt sharpydy. Jalyn 7 gektarda áli byqsyp jatyr.

«Aqjaıyq» memlekettik tabıǵı rezervatynyń dırektory Dáýren Esqabylovtyń aıtýynsha, qamys órti saı ári sýly-batpaqty aýmaqta tutanǵan.

– Bul órt sóndirýdi qıyndatty. Qazir qamys órtiniń oshaqtary oqshaýlandy. Órt tolyq sóndirilmegendikten, jaǵdaıdy baqylaýǵa aldyq, -deıdi Dáýren Esqabylov.

Atyraý oblystyq tótenshe jaǵdaılar departamenti bastyǵynyń orynbasary Rátbek Demeýbergenniń aıtýyna qaraǵanda, tehnıka bara almaıtyn aýmaqtaǵy órt táýlik boıy baqylaýǵa alynǵan.

– Qamys órti tutanǵannan beri departamenttiń jeke quramy 181 gektardaǵy jalyndy sóndirdi. Al, 617 gektardaǵy órt ózi sóndi. «Qazavıaqutqarý» AQ-nyń MI-8 tikushaǵymen qamys órtine áýeden 100 tonna sý tógildi. Qazir 7 gektardaǵy órt oshaǵyn joıý jumysy jalǵasyp jatyr, -deıdi Rátbek Demeýbergen.

Al Atyraý oblystyq ekologııa departamentiniń basshysy Asqar Júsipovtiń pikirinshe, órt saldarynan memlekettik tabıǵı rezervattyń ekojúıesine eleýli zalal kelgen. Soǵan baılanysty órttiń atmosferalyq aýaǵa tıgizgen áserin baǵalaý jumystary bastalǵan.

Eske sala ketelik, buǵan deıin Atyraýdy taǵy da «Aqjaıyq» tabıǵı rezervatynda janǵan qamys tútini basqanyn habarladyq.

Jergilikti tótenshelikter Atyraý turǵyndaryna tútin men ystyń ıisine baılanysty kóshege shyqpaýdy eskertti.

Keıin Atyraýda «Aqjaıyq» rezervatyndaǵy qamys órtin áli sóndirip jatqanyn jazǵan edik.