Atyraýda «Aqjaıyq» tabıǵı rezervatyndaǵy qamys órti áli tolyq sóngen joq
ATYRAÝ. KAZINFORM – Búgin Atyraýda «Aqjaıyq» tabıǵı rezervatyndaǵy qamys órtine tikushaqpen taǵy da sý tógiledi.
Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynan málim etkendeı, qamys órtin sóndirý jalǵasady.
– Búgin, 18 maýsymda saǵat 09:15-te qamys órtiniń oshaǵyna barlaý júrgizý jáne sóndirý jumysyn uıymdastyrý úshin oblys ákiminiń orynbasary Qaırat Nurtaev pen tótenshe jaǵdaılar departamentiniń bastyǵy Nurlan Jańabaev bardy. «QazAvıaQutqarý» AQ-nyń MI-8 tikushaǵynyń arnaıy qurylǵysymen órt oshaǵyna áýeden sý tógiledi, - dep habarlady departamenttiń ımıdjdik jumys jáne syrtqy kommýnıkatsııalar toby.
Atyraý oblysy ákiminiń orynbasary Qaırat Nurtaevtyń aıtýyna qaraǵanda, rezervattaǵy órt oshaǵyn joıý úshin jedel shtab qurylǵan.
– Tórt kúnde 800 gektardan astam aýmaqtaǵy órt oshaǵynyń deni sóndirildi. Órtti sóndirý jumysyna tótenshe jaǵdaılar departamentinen, «Aqjaıyq» tabıǵı rezervaty men orman sharýashylyǵy salasynan, memlekettik organdardan qyzmetkerler jumyldyrylyp, arnaıy tehınkalar tartyldy. Táýlik boıyna kezekshilik uıymdastyryldy. Kezekshilik bir apta boıy jalǵasady, - deıdi Qaırat Nurtaev.
Qamys órtin sóndirýge tótenshe jaǵdaılar departamentinen 78 adam, 11 tehnıka, «Aqjaıyq» memlekettik tabıǵı rezervatynan 32 adam, 8 tehnıka tartylǵan. Jalyndy sóndirý táýlik boıy jalǵasyp jatyr.
Eske sala ketelik, budan buryn Atyraýdy taǵy da «Aqjaıyq» tabıǵı rezervatynda janǵan qamys tútini basqanyn jazǵan edik.
Tótenshelikter Atyraý turǵyndaryna tútin men ystyń ıisine baılanysty kóshege shyqpaýdy eskertti.
Al keshe Atyraýda «Aqjaıyq» tabıǵı rezervatyndaǵy órtke tikushaqpen 100 tonna sý tógilgenin habarlaǵan bolatynbyz.