Atyraýda «Aqjaıyq» tabıǵı rezervatyndaǵy qamys órti áli byqsyp jatyr

ATYRAÝ. KAZINFORM — Atyraýda «Aqjaıyq» tabıǵı rezervatyndaǵy qamys órti tolyq sóngen joq. Jalyn sharpyǵan aýmaq áli byqsyp jatyr.

Atyraý qalasynyń ákimi Shákir Keıkınniń aıtýynsha, rezervattaǵy órtti sóndirýge tartylǵanǵan qutqarýshylar men áskerılerge qoldaý kórsetilip otyr. 

— Qamys órtin sóndirýshiler men mamandarǵa kún saıyn 3 mezgil ystyq tamaq jetkizý uıymdastyrylyp jatyr. Arnaıy tehnıkalar úshin janar-jaǵar maı jetkizý qolǵa alyndy, — deıdi Shákir Keıkin.

«Aqjaıyq» rezervatyndaǵy órtti sóndirýge Atyraý oblysynyń aýmaqtyq qorǵanys brıgadasynan 30 áskerı qyzmetshi tartyldy. 

— Batys óńirlik qolbasshylyǵynyń buıryǵyna sáıkes Atyraý oblysynyń aýmaqtyq qorǵanys brıgadasyna qarasty 99246 áskerı bóliminen 30 áskerı qyzmetshini órt sóndirýshilerge kómekke jiberýge sheshim qabyldandy. Jeke quram oblystyq tótenshe jaǵdaılar departamentiniń qyzmetkerlerimen birge jalyndy sóndirýge kiristi, — deıdi aýmaqtyq qorǵanys batalonynyń komandıri Rýslan Spanov.

Atyraý oblystyq polıtsııa departamenti balyq qoryna qol suǵýshylyqqa qarsy kúres bóliminiń qyzmetkeri Bekzat Shapaǵattyń aıtýyna qaraǵanda, rezervat aýmaǵy baqylaýǵa alynǵan. 

— «Aqjaıyq» tabıǵı rezervatynyń aýmaǵynda balyq aýlaýǵa, bóten adamnyń júrýine tyıym salyndy. Qazir 13 polıtseı táýlik boıy patrýldep júr. Tártip saqshylaryna 1 dron jáne 4 avtokólikpen qamtyldy, — deıdi Bekzat Shapaǵat.

Eske sala ketelik, buǵan deıin «Aqjaıyq» tabıǵı rezervatyndaǵy órtke adam faktorynyń áseri bolýy múmkin ekenin habarlaǵan bolatynbyz. 

Sondaı-aq, «Aqjaıyq» rezervatyndaǵy órtti sóndirýge taǵy bir tikushaq tartyldy. 

Atyraý oblysynyń ákimi Serik Shápkenov qamys órtine baılanysty tótenshe jaǵdaı jarııalaýǵa negiz joq ekenin aıtty.