Atyraýda «Aqjaıyq» tabıǵı rezervatyndaǵy 50 gektarda qamys órti sóndirilip jatyr

ATYRAÝ. KAZINFORM — «Aqjaıyq» tabıǵı rezervatynda 1200 gektardy sharpyǵan qamys órti sóndirildi. Qazir 50 gektardaǵy jalyndy sóndirý jalǵasyp jatyr.

Atyraý oblysy ákiminiń orynbasary Qaırat Nurtaev pen Atyraý oblystyq tótenshe jaǵdaılar departamentiniń bastyǵy Nurlan Jańabaev órt oshaǵyndaǵy jedel shtabqa jetekshilik etip júr. 

— Ótken túnde órt aýmaǵy 400 gektarǵa ulǵaıdy. Buǵan jel baǵytynyń turaqsyzdyǵy men kúsheıýi áser etti. Búgin, 18 maýsymdaǵy tańerteńgi jaǵdaı boıynsha 1 206 gektar aýmaqtaǵy órt sóndirildi. Qazir 50 gektarǵa jýyq aýmaqta jalyn oshaǵy oqshaýlanyp jatyr. Oǵan 120-dan astam adam men 30-ǵa jýyq tehnıka jumyldyryldy, — dep habarlady oblys ákiminiń baspasóz qyzmeti. 

Qamys órtin sóndirýge tótenshe jaǵdaılar departamentiniń kúshteri men quraldary, «Aqjaıyq» memlekettik tabıǵı rezervatynyń qyzmetkerleri, orman sharýashylyǵy mamandary men merdiger mekemeler tartylǵan.

Sonymen qatar Atyraý oblysynda «Aqjaıyq» tabıǵı rezervatyndaǵy órtti sóndirý úshin amfıbııa-ekskavatoryn tartýǵa sheshim qabyldandy. Oblys ákimi baspasóz qyzmetiniń aqparatyna súıensek, órt sóndirý tehnıkalary jete almaıtyn aýmaqqa amfıbııa-ekskavatory jetkizilgen. 

— Ekskavator Jaıyq ózeninde júrgizilip jatqan túp tereńdetý jumysynan alynyp, batpaqty aýmaqtarda mıneraldyq qorǵanys jolaqtaryn salý úshin qoldanylady. Bul ádis tutaný oshaqtaryn oqshaýlaýdy, joıýdy jyldamdatýǵa, órttiń odan ári taralýynyń aldyn alýǵa múmkindik beredi. Jer bederiniń batpaqty jáne shymtezekti bolýy qamys órtin sóndirýdi qıyndatyp tur. Mundaı jaǵdaıda sóndirilgen ottyń qaıta tutaný qaýpi joǵary bolady. Amfıbııa-ekskavatordy qoldaný — tıimdi ári qajetti sheshim, — delingen habarlamada.

Eske sala keteıik, budan buryn Atyraýda «Aqjaıyq» tabıǵı rezervatyndaǵy qamys órti áli tolyq sónbegenin jazǵan bolatynbyz. 

Al búgin «Aqjaıyq» rezervatyndaǵy ahýal baqylaý munaralarynan tikeleı kórsetilip jatyr.