Atyraýda «Aqjaıyq» rezervatyndaǵy órtti sóndirýge taǵy bir tikushaq tartyldy

ATYRAÝ. KAZINFORM – Atyraý oblysynda «Aqjaıyq» tabıǵı rezervattaǵy órtti sóndirý jumysyna ekinshi tikushaq qosyldy.

Atyraý oblysy ákiminiń baspasóz qyzmetinen málim etkendeı, búgin ekinshi tikushaq Mańǵystaý oblysynan jetkizilgen.

– «Aqjaıyq» rezervatynyń aýmaǵyndaǵy órtti tolyq sóndirý úshin 2 tikushaq tartyldy. Búgin tikushaqtyń birimen 9 márte sý tógildi. Jalpy órt bastalǵaly beri tikushaqtyń qurylǵysymen tógilgen sý 130 tonnaǵa jetti. Alaıda, jel ekpininiń kúsheıýi órtti sóndirýge kedergi keltirip tur, -dep habarlady ákimniń baspasóz qyzmeti.

Búgin rezervat aýmaǵynda órtti toqtatý maqsatynda mıneraldy jolaq júrgizýge qosymsha 10 aýyl sharýashylyǵy tehnıkasy kirisken. Keshe bul jumysqa 2 traktor tartylǵan edi.

– Mıneraldy jolaq órt aýmaǵyn azaıtýǵa septigin tıgizedi. Jalynnyń basqa aýmaqqa jaıylmaýyna múmkindik beredi. Qazir arnaıy qurylǵan jedel shtab rezervat aýmaǵyndaǵy órtti sóndirý jumysyn táýlik boıy úılestirip otyr. Órtti sóndirý jumysyna 130-ǵa jýyq adam, 35 tehnıka tartyldy, - dep málim etti baspasóz qyzmetinen.

Eske sala ketelik, budan buryn «Aqjaıyq» rezervatyndaǵy ahýal baqylaý munaralarynan tikeleı kórsetile bastaǵanyn jazdyq.

Keshe 50 gektarda qamys órti sóndirip jatqanyn habarlaǵan edik.

Al, búgin «Aqjaıyq» tabıǵı rezervatyndaǵy órtke adam faktorynyń áseri bolýy múmkin ekenin habarladyq.