Atyraýda «Aqjaıyq» rezervatyndaǵy qamys órtine tikushaqpen 12 tonna sý tógildi

ATYRAÝ. KAZINFORM – Atyraýda «Aqjaıyq» tabıǵı rezervatyndaǵy qamys órti áli sóngen joq. Jalyndy sóndirý úshin tikushaqpen 12 tonna sý tógildi.

Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynyń málimetinshe, qamys órtin sóndirýge tikushaq tartylǵan. 

– Qazir «Aqjaıyq» tabıǵı rezervatynyń aýmaǵynda órt sharpyǵan aýmaǵy – 600 gektar. Onyń 300 gektarynda jalyn ózdiginen sóndi. Al, 300 gektardaǵy jalyndy sóndirý jalǵasyp jatyr. Batpaqty jer bederi órt sóndirý tehnıkalarynyń jetýine qıyndyq keltirdi. Sol sebepten, qamys órtin áýeden sóndirý úshin saǵat 16:50-de «Qazavıaqutqarý» AQ-nyń MI-8 tikushaǵy tartyldy. Saǵat 18:00-ge deıin tikushaqpen 1 reıs jasalyp, 12 tonna sý tógildi. Aerovızýaldy baqylaý júrgizilip, jalynnyń ashyq oshaǵy anyqtaldy, - dep habarlady departamenttiń ımıdjdik jumys jáne syrtqy kommýnıkatsııalar toby.

Tabıǵı rezervattaǵy qamys órtin sóndirýge oblystyq tótenshe jaǵdaılar departamentinen 50 qyzmetker, 10 tehnıka, «Aqjaıyq» memlekettik tabıǵı rezervatynan 27 adam, 6 tehnıka jáne bir júzý quraly tartylǵan. 

Eske sala ketelik, buǵan deıin Atyraýdy taǵy da «Aqjaıyq» tabıǵı rezervatynda janǵan qamys tútini basqanyn jazǵan edik. 

Sondaı-aq, jergilikti tótenshelikter Atyraý turǵyndaryna tútin men ystyń ıisine baılanysty kóshege shyqpaýdy eskertti.