Atyraýda «Aqjaıyq» rezervatyndaǵy qamys órti 10 kúnnen beri sónbeı tur

ATYRAÝ. KAZINFORM – Búgin Atyraý oblysynda «Aqjaıyq» tabıǵı rezervatyndaǵy qamys órtiniń tutanǵanyna 10 kún boldy. Órt áli byqsyp jatyr.

Atyraý oblystyq tótenshe jaǵdaıdar departamentiniń ımıdjdik jumys jáne syrtqy kommýnıkatsııalar tobynyń málimetinshe, rezervatta jalyn sharpyǵan aýmaq 1 500 gektardan asqan. 

– «Aqjaıyq» memlekettik tabıǵı rezervat aýmaǵyndaǵy qamys órti áli byqsyp jatyr. Qazir órt oshaǵyn sóndirýge 122 adam, 16 tehnıka jumyldyryldy. Onyń ishinde oblystyq tótenshe jaǵdaılar departamentinen 32 órt sóndirýshi, 8 tehnıka, rezervattan 20 adam, 7 tehnıka, jergilikti atqarýshy organ men orman sharýashylyǵynan 11 adam, 1 tehnıka, «ArnaıyAvtobaza» JShS-dan 59 adam bar, -dep habarlady departamenttiń ımıdjdik jumys jáne syrtqy kommýnıkatsııalar toby. 

Búgin byqsyp jatqan qamys órtine sý shashýǵa tikushaq tartylmaǵan. Alaıda, 13 maýsymnan beri tikushaqtyń arnaıy qurylǵysymen 480 tonna sý tógilgen. 

Eske sala ketelik, buǵan deıin «Aqjaıyq» tabıǵı rezervatyndaǵy órtke adam faktorynyń áseri bolýy múmkin ekenin habarlaǵan edik. 

Sondaı-aq, «Aqjaıyq» rezervatyndaǵy órtti sóndirýge taǵy bir tikushaq tartyldy. 

Atyraý oblysynyń ákimi Serik Shápkenov qamys órtine baılanysty tótenshe jaǵdaı jarııalaýǵa negiz joq ekenin aıtty. 

Al keshe Atyraýda «Aqjaıyq» tabıǵı rezervatyndaǵy qamys órti áli byqsyp jatqanyn jazǵan bolatynbyz.