Atyraýda ákimdik tasqyn kezinde apatty dep tanylǵan úılerin buzbaǵan 99 turǵyndy sotqa berdi
ATYRAÝ. KAZINFORM — Osydan 2 jyl buryn tasqyn kezinde úıleri apatty dep tanylyp, ótemaqy alǵan 99 turǵyndy Jylyoı aýdany ákimdigi sotqa berdi. Óıtkeni turǵyndar arnaıy komıssııa sheshimimen turýǵa qaýipti dep tanylǵan baspanalaryn buzý asyǵar emes.
Jalpy aýdanda 2957 úı tasqynnan zardap shekti. Onyń 1420-sy apatty dep tanyldy. Qalǵany kúrdeli jóndeýdi talap etti.
Jylyoı aýdanynyń ákimi Jumabek Qarajanovtyń sózinshe, zardap shekken turǵyndar arasynda ótemaqy alsa da, úıin buzbaı, jóndep alǵandar bar.
— 2024 jyly ótemaqy tólep jatqan kezde «úıimiz kúrdeli jóndeýge jatpaıdy, apatty dep tanyp berińizder» dep kelgen azamattar bar. Zań boıynsha ol úılerdi buzý kerek. Jańa baspana salý úshin úkimet qarjy berdi. Keı azamattar úılerin buzbaı, kúrdeli jóndeý jasap, qalǵan qarjyny basqa maqsatta jumsady, — dedi aýdan ákimi.
Aýdan ákiminiń aıtýynsha, osy másele boıynsha jınalǵan materıaldar aýdandyq sotqa jiberilgen. Aldymen eskertý beriledi, ony elemegen jaǵdaıda úılerdi buzý mindetteledi.
— Ótemaqy berildi. Eń bastysy — adamdardyń qaýipsizdigi. Negizi jaýapkershilik azamattardyń óz moınynda. Degenmen bul máselege beıjaı qaraı almaımyz, — dep tolyqtyrdy Jumabek Qarajanov.
Máselege qatysty ister sotta qaralyp jatyr. Taraptardyń pikirin tyńdap jatyr.
Resmı aqparatqa súıensek, qazirgi ýaqytta aýdanda tasqynnan zardap shekken bir ǵana turǵyn turǵyn úı máselesine qatysty ótemaqy almaǵan. Óıtkeni, ol baspanany baǵalaý qunymen kelispeıdi. Ákimdik pen turǵyn arasynda sot bolyp, azamat sottyń eki satysynan da jeńilip qalǵan.
Buǵan deıin Jylyoı aýdanynyń Araltóbe ýchaskesinde sý qoımasyn salý josparlanyp otyrǵanyn jazǵan edik.
