Atyraýda ákimdik pen avtopark daýy júrgizýshiler jalaqysynyń azaıýyna áser etip otyr
ATYRAÝ. KAZINFORM – Atyraýda Algabus jáne Atyrau-Avtopark kompanııalarynyń bir top júrgizýshisi jalaqynyń qysqartylýyna baılanysty narazylyq bildirdi.
Júrgizýshilerdiń aıtýynsha, basshylyq sáýir aıynan bastap eńbekaqy mólsheriniń tómendeıtini týraly eskertý jasaǵan. Buǵan deıin kompanııa qyzmetkerlerge bir saǵattyq jumys úshin 3500 teńge tólep kelgen. Endi bul tólem 2480 teńgege deıin azaıtylmaq.
- Kúnine 15 saǵat jumys jasaımyz. 15 myń teńgemizdi qıyp tastaıyn dep otyr. Biz jalaqyny ósir dep jatqan joqpyz. Burynǵydan qaldyrýdy suraımyz. Sáýir aıynda arnaıy habarlandyrýǵa qol qoısaq, tabysymyz óte tómen túsip keteıin dep tur. Al kelispesek, jumysty toqtatýǵa týra keledi, - dedi avtobýs júrgizýshi Berik Erjanov.
Júrgizýshiler eńbekaqyny kóterýdi emes, burynǵy deńgeıde qaldyrýdy ǵana surap otyr.
- 2024 jyldyń jazynda jalaqymyzdy kóterdi. Ózimiz sol aılyqqa qanaǵattanamyz. Atyraýda 7 avtopark jumys isteıdi. Sonyń beseýinde jumys isteıtin júrgizýshiler tómengi jalaqy alyp otyr. Túsingenimiz boıynsha, bizderdiń aılyǵymyzdy solarmen teńestireıin dep otyr. Al biz oǵan qarsymyz, - dedi avtobýs júrgizýshisi Meńdigereı Amanov.
Atyraý qalasy ákiminiń orynbasary Meıirjan Muqasovtyń aıtýynsha, avtoparktermen jasalǵan kelisimge sáıkes, júrgizýshilerdiń jalaqysy bıýdjet qarajatyna baılanysty arnaıy komıssııa hattamasy arqyly bekitiledi. Onyń málimetinshe, komıssııa esepteýlerine sáıkes júrgizýshilerdiń jalaqysy shamamen 500 myń teńge deńgeıinde belgilengen. Alaıda avtopark basshylyǵy 2024 jyldyń qyrkúıeginen bastap bul mólsherden joǵary jalaqy tóleý týraly óz betinshe sheshim qabyldaǵan. Keıin kompanııa bul somany tóleý qıynǵa soǵyp, ákimdikke júgingen.
- 2025 jyly áriptesterimiz tıisti hattamany jasap, 500 myń teńgeni 531 myń teńgege kóbeıtti. Bul júrgizýshilerge sezilmeıdi. Sebebi, bul jalaqyny olar 2024 jyldyń qyrkúıeginen beri alyp kele jatyr. Al avtopark kelip óziniń sheshimi boıynsha jasap otyrǵan tólemin endi ári qaraı jasaı almaımyz degen másele týyndap otyr. Bul máseleni qazir zerdelep jatyrmyz, - dedi qala ákiminiń orynbasary Meıirjan Muqasov.
Al avtopark ókilderi ákimdiktiń bul pikirimen kelispeıdi. AtyrauAvtopark JShS zańgeri Arsen Qanatovtyń aıtýynsha, komıssııa sýbsıdııalaý erejelerin tolyq eskermeı otyr. Bıyl ákimdik júrgizýshilerdiń jalaqysyn 531 myń teńge deńgeıinde bekitýdi usynǵan. Alaıda kompanııanyń málimetinshe, statıstıkalyq derekter boıynsha bul kezeńde eńbekaqy mólsheri 715 myń teńge bolýy tıis.
Jolaýshylar tasymalymen aınalysatyn mekeme statıstıkalyq derekterdi negizge alyp, komıssııa sheshimimen kelispeıtinin aıtyp, birneshe ret sotqa aryzdanǵan. Sot sheshimimen eki ortadaǵy aıyrmashylyqty ózderine óndirip otyrǵan. Ótken jyldyń jeltoqsan aıynda sot ákimdikke tasymaldaýshy kompanııaǵa 241 mln teńge tóleýdi mindettegen. Avtopark ókili áli bul qarjynyń tólenbegenin aıtyp otyr. Qazir kompanııa qarjylyq jaǵdaıdyń kúrdelenýine baılanysty júrgizýshilerge burynǵydaı joǵary jalaqy tóleı almaıtyndyqtan qalalyq ákimdiktiń komıssııasynyń sheshimine sáıkes aılyq tóleýdi jón kórip otyr.
- Qaıta-qaıta sottaspaý úshin jalaqyny 531 teńgege tómendedip otyrmyz. Alaıda statıstıkalyq departamenttiń málimetinshe, qazirgi kezeńge 715 myń teńge tólenýi kerek. Bul boıynsha kólik mınıstrliginen de, statıstıka bıýrosynan da jaýap aldyq. Tarıftik komıssııa bizdiń bergen qujattarymyzdy qabyldamaı 531 myń teńge bolýy kerek dep sheshim shyǵaryp otyr, - dedi AtyrauAvtopark JShS zańgeri Arsen Qanatov.
Avtopark basshylyǵy tarıf máselesin sheshý úshin sotqa júgingenin málimdedi.
Buǵan deıin Atyraýda qoǵamdyq kólikterdi sýbsıdııalaýǵa shamamen 11 mlrd teńge kerektigin jazǵan edik.
