Atyraýda ákesi men qyzynyń ólimine kináli KamAZ júrgizýshisi 5 jylǵa sottaldy
ATYRAÝ. KAZINFORM – Atyraýda ákesi men qyzynyń ólimine sebepker bolǵan KamAZ júrgizýshisine qatysty sot úkimi shyqty. Jol-kólik oqıǵasyna kináli júrgizýshi 5 jylǵa sottaldy .
Sot isiniń materıalyna súıensek, jol-kólik oqıǵasy 24 naýryzda Atyraý-Damby jolynda bolǵan. KamAZ júrgizýshisi jol júrisi qaǵıdalaryn óreskel buzyp, qarsy baǵyttaǵy Vaz-21120 markaly kóligine soqtyǵysqan. Jol apatynan jeńil kóliktiń júrgizýshisi men kámeletke tolmaǵan qyzy oqıǵa ornynda kóz jumǵan. Al ózge jolaýshylar túrli dene jaraqatyn alǵan.
Júk kóliginiń júrgizýshisi K.-ge qatysty QR Qylmystyq kodeksiniń 345-babynyń 4-bóligimen qylmysttyq is qozǵalǵan. Atalǵan qylmystyq is Atyraý oblysynyń qylmystyq ister jónindegi mamandandyrylǵan aýdanaralyq sotynda qaraldy.
«Sottalýshynyń kinási jábirlenýshilerdiń, kýálardyń, óziniń jaýaptarymen, saraptamalar qorytyndylarymen, oqıǵa bolǵan jerdi qaraý hattamasymen, jol-kólik oqıǵasynyń beınejazbasymen jáne basqa da dáleldemeler jıyntyǵymen dáleldendi. Prokýror sottalýshy K.-ny kólik quralyn basqarý quqyǵynan 7, bas bostandyǵynan 5 jyl merzimge bas bostandyǵynan aıyrý jazasyn taǵaıyndaýdy surady», -dep habarlady sottyń baspasóz qyzmeti.
Alaıda, jábirlenýshiler sottalýshyǵa keshirim berdi. Sóıtip, K.-ny bas bostandyǵynan aıyrmaýdy surady. Sottalýshy ózine taǵylǵan aıypty, kinásin moıyndaǵan joq.
Sot jaza taǵaıyndaý kezinde sottalýshyǵa qatysty birneshe jaıtqa nazar aýdardy. Birinshiden, sottalýshynyń otbasylyq jaǵdaıyn, asyraýynda kámelet jasyna tolmaǵan balalarynyń baryn eskerdi. Ekinshiden, jábirlenýshi tarapqa múliktik, moraldyq zalaldy erikti túrde ótegenin jazany jeńildetetin mán-jaılar retinde tanydy. Aýyrlatatyn mán-jaılar anyqtalmaǵan.
«Sot úkimimen sottalýshy K. QR Qylmystyq kodeksiniń 345-babynyń 4-bóligimen kináli dep tanyldy. Oǵan kólik quralyn basqarý quqyǵynan 7 jyl merzimge, bas bostandyǵynan 5 jyl merzimge aıyrý túrindegi jaza taǵaıyndaldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik,buǵan deıin Atyraýda tún ortasynda moped qaqqan 28 jastaǵy áıel aýrýhanada kóz jumǵan edi.
