Atyraýda «Aq Jaıyq» qonaq úıi buzylyp jatyr
ATYRAÝ. KAZINFORM — Atyraýda 1973 jyly salynǵan burynǵy «Aq Jaıyq» qonaqúıiniń ǵımaraty buzylyp jatyr. Nysan birneshe jyl boıy paıdalanylmaı turǵan. Qazir demontaj júrip jatyr, ony qarasha aıynyń ortasynda aıaqtaý josparlanǵan.
Ǵımarat bastapqyda «Gýrev» qonaqúıi dep atalǵan.
1990 jyldary jekemenshikke ótken nysan keıin birneshe kompanııanyń menshigine aýysqan.
2018 jylǵy 4 shildede qonaqúıge japsarlas ornalasqan meıramhanadan órt shyqty.
Jalyn kommýnıkatsııalyq shahtalar arqyly ǵımarattyń joǵarǵy qabattaryna taraǵan.
Órt shamamen 3,5 myń sharshy metr aýmaqty sharpyp, ony sóndirý jumysty toǵyz saǵattan astam ýaqytqa sozylǵan.
Oqıǵadan keıin ǵımarat paıdalanylmaı turdy. Endi onyń ornyna jańa qonaqúı-iskerlik ortalyǵyn salý josparlanyp otyr.
Bıyl atyraýlyq kompanııa qonaqúıdiń ornyna bıiktigi 130 metr bolatyn qonaqúı-iskerlik ortalyǵynyń jobasyn tanystyrǵan edi.
Investordyń jospary boıynsha keshende 600 nómirli bes juldyzdy qonaqúı, 12 myń sharshy metrden astam kommertsııalyq alań, 500 oryndyq konferentsııa zaly, SPA jáne fıtnes ortalyqtary men meıramhanalar ornalasady. Nysandy 2030 jylǵa qaraı paıdalanýǵa berý kózdelgen.
Joba avtorlarynyń málimetinshe, ǵımarattyń joǵarǵy qabattarynan Kaspıı teńizin kórýge múmkindik bolady. Sondaı-aq josparda zıplaın attraktsıony da bar. Ol Eýropa men Azııa arasyndaǵy baılanysty kórsetetin nysan retinde usynylǵan. Onyń naqty qalaı júzege asyrylatyny ázirshe belgisiz.
Buǵan deıin osy qonaqúıdiń janynda gúl dúkeni bar kásipker Konstantın Şerbakov birneshe jyldan beri ákimdiktiń aýmaqty memleket muqtajdyǵyna alý týraly sheshimimen kelispeıtinin jazǵan edik.
