Atyraýda adamdardy aldap múlki men aqshasyn ıemdengen kúdikti ustaldy

ATYRAÝ. KAZINFORM – Atyraýda birneshe adamdy alaıaqtyq jolmen aldaǵan 30 jastaǵy kúdiktiniń isi tergelip jatyr. Qazir kúdikti qamaýda otyr. 

Atyraý polıtsııa departamentiniń baspasóz qyzmetiniń aqparatyna súıensek, kúdikti bir jyl boıy adamdardy aldap, aqshasyn ıemdenip kelgen.

«Atyraý qalasynyń turǵyny 2022-2023 jyldary tanysynyń senimine kirip, jumysqa turǵyzyp beremin dep aldaǵan. Sóıtip, jábirlenýshige 800 myń teńge materıaldyq shyǵyn keltirgen. Kúdikti qylmystyq áreketin jasaý úshin áıeldiń daýsymen sóılep, birneshe sım-kartany paıdalanyp otyrǵan. Qala aýmaǵynda ornalasqan páterdi jalǵa alyp, ony satyp jiberý úshin aldyn ala tólemder alǵan. Máselen, 150 myń teńgege jalǵa alǵan páterdi 8 mln teńgege satatyny jóninde jarnama shyǵarǵan. Jábirlenýshiden páter úshin avtokólik pen 2 mln teńge kóleminde saýdalasyp, aqshany notarıaldy túrde qaryz alý shartyn jasaqtaý arqyly alatynyn aıtqan. Osylaısha, jábirlenýshige 2 mln teńge materıaldyq shyǵyn keltirgeni anyqtaldy», - dep habarlady departamenttiń baspasóz qyzmeti.

Sondaı-aq, atalǵan kúdikti turmystyq tehnıkalyq zattardy satý úshin áleýmettik jelide jarnama berip, birneshe turǵyndy aldaǵan. Qazir 30 jastaǵy kúdiktige «Alaıaqtyq» deregimen qozǵalǵan qylmystyq is tergelip jatyr. Kúdikti qamaýǵa alynǵan.

«Oblys turǵyndary men qonaqtaryna alaıaqtyq áreketke aldanbaý úshin áleýmettik jelidegi jarnamalardy muqııat tekserip, aqshaǵa muqııat bolýdy eskertemiz. Modıldi telefonǵa kelgen ár habarlandyrýdyń durystyǵyn teksergen jón», -dep málim etti departamenttiń baspasóz qyzmetinen.

Eske sala ketelik, buǵan deıin Atyraýda alaıaqtyqqa baılanysty 300-ge jýyq qylmystyq is sotqa joldanǵanyn habarlaǵan edik.

Sondaı-aq, úsh jylǵa sottalǵan atyraýlyqtyń jazasy bas bostandyǵyn shekteýge aýystyrylǵanyn jazǵan bolatynbyz.