Atyraýda Abaı murasy ulyqtalǵan ádebı-sazdy kesh ótti
ATYRAÝ. KAZINFORM — Atyraýda qazaqtyń bas aqyny, uly oıshyl ári aǵartýshy Abaı Qunanbaıulynyń týǵan kúnine oraı «Abaı murasy — ult qazynasy» atty ádebı-sazdy mádenı is-shara ótti.
Jıynǵa óńir turǵyndary men qala qonaqtary qatysyp, uly aqynnyń shyǵarmashylyǵyna arnalǵan taǵylymdy baǵdarlamany tamashalady.
Іs-Shara Mahambet atyndaǵy akademııalyq qazaq drama teatry akterleriniń qatysýymen daıyndalǵan teatrlandyrylǵan poetıkalyq prologpen bastaldy. Sahnalyq qoıylymda Abaıdyń ómir joly men aǵartýshylyq qyzmeti, aqynnyń óleńderi men qara sózderindegi taǵylymy kórkemdik sheshim arqyly kórermenge usynyldy.
Merekelik jıynda Atyraý oblysy ákiminiń orynbasary Daryn Shamuratov jınalǵan qaýymdy Abaı kúnimen quttyqtap, uly aqyn murasyn dáripteýdiń búgingi qoǵam úshin mańyzyna toqtaldy.
— Abaı qazaq rýhanııatynyń shamshyraǵy, temirqazyǵy. Alashtyń sol temirqazyǵy bıikte jarqyrap júrýi úshin, aqsaqaldarymyzdan bastap, keıingi urpaq Abaı órkenıetin damytýǵa eńbek etý kerek. Keler urpaqtyń boıyna kemeldilikti sińirip, uly aqyn armandaǵan jaqsy qoǵamdy qalyptastyrýǵa jumyla atsalysýymyz qajet, — dedi Daryn Shamuratov.
Budan keıin is-sharaǵa qatysýshylar Abaı eskertkishine gúl shoqtaryn qoıyp, uly aqynnyń rýhyna taǵzym etti.
Ádebı-sazdy kesh oblystyq fılarmonııa ónerpazdarynyń kontserttik baǵdarlamasyna ulasty. Kórermen nazaryna Abaıdyń ánderi, kúıler men aqyn shyǵarmalary negizindegi poezııalyq kompozıtsııalar usynyldy.
