Atyraýda 94 azamat abattandyrý erejesin birneshe márte buzǵan
ATYRAÝ. KAZINFORM — Atyraýda jyl basynan beri abattandyrý qaǵıdalaryn buzýdyń 5 110 deregi anyqtaldy. Sonymen qatar ortaq paıdalanylatyn oryndardy lastaýdyń 286 deregi tirkeldi.
Polıtsııa departamentiniń málimetinshe, 94 tulǵa quqyqbuzýshylyqqa bir jyl ishinde birneshe márte jol bergen. Barlyq derek boıynsha tıisti ákimshilik sharalar qabyldandy.
Máselen, 11 qazanda saǵat 16:21 shamasynda Atyraý qalasyndaǵy Azattyq kóshesinde 1974 jyly týǵan er adam qoqys qaldyqtaryn shyǵaryp, abattandyrý qaǵıdalaryn buzǵan.
— Budan bólek, 28 qyrkúıekte Qurmanǵazy aýdanynyń Qydyr ata kóshesindegi úılerdiń artynda ornalasqan qoqys konteınerleriniń ýaqytyly tazalanbaǵany anyqtaldy. Aýmaqty kútip ustaýǵa jaýapty mekeme óz mindetterin tıisinshe oryndamaǵandyqtan, konteınerler shamadan tys tolyp, turmystyq qaldyqtar aınalaǵa shashylǵan. Tekserý barysynda mekemeniń abattandyrý qaǵıdalaryn buzýdy bir jyl ishinde qaıtalaǵany belgili boldy. Osyǵan baılanysty ol ákimshilik jaýapkershilikke tartyldy, — dep habarlady polıtsııa.
Polıtsııa departamenti qoqys pen ózge de qaldyqtardy belgilenbegen oryndarǵa tastaǵany úshin zańnamada ákimshilik jaýapkershilik kózdelgenin eskertti. Vedomstvo turǵyndardy tazalyq talaptaryn saqtaýǵa, qorshaǵan ortany lastamaýǵa jáne qaldyqtardy arnaıy belgilengen oryndarǵa tastaýǵa shaqyrdy.
Buǵan deıin Almatyda abattandyrý kezinde zań buzǵan merdigerge aıyppul salynǵanyn jazǵan edik.
