Atyraýda 90,4 myń kásipker jalpyǵa birdeı deklaratsııa tapsyrǵan

ATYRAÝ. KAZINFORM – Atyraýda jalpyǵa birdeı deklaratsııaǵa sáıkes 90 myń kásipker men olardyń jubaılary kirisin jarııa etken.

Atyraý qalalyq Memlekettik kirister basqarmasy basshysynyń mindetin atqarýshy Aıbol Amanovtyń málimetinshe, bıyl 103 668 adam deklaratsııa tapsyrýy qajet.

«Qazir aktıvter men mindettemeler týraly deklaratsııany 90 myń 473 kásipker men olardyń jubaıy tapsyrdy. Bul – jalpyǵa birdeı deklaratsııalaýdaǵy úshinshi kezeń deklaranttarynyń 90%-ǵa jýyǵy. Al, deklaratsııa tapsyrmaǵandardy ákimshilik jaýapkershilikke tartý qarastyrylǵan. Alǵashynda olarǵa eskertý beriledi. Bir jyl ishinde eskertý elemese, onda 51 myń 750 teńge (15 AEK) mólsherinde aıyppul salynady. Tolyq emes nemese anyq emes málimetterdi birinshi ret usynǵany úshin eskertý, al bir jyl ishinde muny taǵy qaıtalasa, 10 myń 350 teńge (3 AEK) mólsherinde aıyppul tóleıdi», - deıdi Aıbol Amanov.

Onyń aıtýynsha, aldaǵy jyldyń 1 qańtarda bastalatyn tórtinshi kezeńde azamattardyń qalǵan sanattary deklaratsııa tapsyrady. Bul sanattarǵa jeke qurylymdardyń qyzmetkerleri, úı sharýasyndaǵy áıelder, zeınetkerler men stýdentter kiredi. Atyraý qalasynda atalǵan sanattarǵa jatatyndardyń sany – 419 363 adam.

Eske sala ketelik, buǵan deıin Atyraýda 8 laýazymdy tulǵa tártiptik jaýapkershilikke tartylǵanyn habarlaǵan bolatynbyz.