Atyraýda 800 oryndyq jataqhananyń jobalaý jumysy nege uzaqqa sozyldy
ATYRAÝ. KAZINFORM — Halel Dosmuhameduly atyndaǵy Atyraý ýnıversıtetiniń stýdentterine arnalǵan 800 oryndyq jańa jataqhana qurylysy birneshe jyldan beri bastalmaı keledi. Buǵan eski ǵımarat aýmaǵynda órt qaýipsizdigi talaptaryna sáıkes arnaıy órt sóndirý tehnıkalarynyń erkin kirip-shyǵýyna múmkindik bolmaýy sebep.
№ 2 jataqhana 2023 jyldyń aqpanynda apatty dep tanylǵan. Ákimdik onyń ornyna jańasyn salý úshin jobalaýdy 2023 jyldyń qazan aıynda bastady. Alaıda bul jumys sozbalańǵa salynyp ketti. Muny ákimdik órt qaýipsizdigi normalaryn tolyq saqtaý maqsatynda qosymsha jer telimin alý jáne ony memlekettik muqtajdyq úshin alyp qoıý rásimderine ketken ýaqytpen baılanystyrady.
Al ýnıversıtet rektory Salamat Idrısovtyń aıtýynsha, jataqhana qurylysynyń keshigýi stýdentterdi ornalastyrýǵa áser etip otyrǵan joq. Qazir joǵary oqý orny úsh jataqhana arqyly suranysty tolyq qamtamasyz etip otyr.
— Bizde búginde 9 myńǵa jýyq stýdent bilim alady. Jataqhanaǵa muqtaj stýdentterdiń barlyǵy orynmen qamtamasyz etilgen. Stýdentter aıyna 10 myńnan 15 myń teńgege deıin tólep turady, al áleýmettik osal sanattaǵy jastar jataqhanada tegin turady. Degenmen jańa jataqhana biz úshin óte mańyzdy joba. Bul tek turatyn oryn emes, stýdentterge arnalǵan zamanaýı kovorkıng jáne demalys aımaqtary bar kópfýnktsıonaldy ortalyq bolady. Ókinishke qaraı, joba memlekettik saraptamadan birneshe ret eskertýlermen qaıtarylyp, sonyń saldarynan qurylys merzimi uzaryp ketti, — dedi Salamat Idrısov.
Jańa jataqhana ózara baılanysqan úsh bloktan turady. Jobada stýdentterdiń jaıly turýyna, bilim alýyna jáne bos ýaqytyn tıimdi ótkizýine qajetti barlyq jaǵdaı qarastyrylǵan. A jáne V bloktarynda jalpy 800 stýdentke arnalǵan turǵyn bólmeler bar. Ár qabatta qyzdar men uldarǵa arnalǵan jeke sektsııalar qarastyrylǵan. Sonymen qatar A blogynyń birinshi qabatynda medıtsınalyq blok, ózine-ózi qyzmet kórsetetin kir jýý orny, jeke zattardy saqtaýǵa arnalǵan qoıma, qujattardy basyp shyǵarý jáne keńse taýarlaryn satý orny, sondaı-aq jataqhana qyzmetkerlerine arnalǵan kabınetter bar.
Ortalyq B blogynda 100 oryndyq ashana, 80 oryndyq oqý zaly bar kitaphana, kompıýterlik synyptar, stýdentterdiń bos ýaqytyn uıymdastyrý ortalyǵy, erekshe qajettiligi bar stýdentterge beıimdelgen bólmeler jáne 150 oryndyq akt zaly qarastyrylǵan. Sondaı-aq munda 20 trenajerge arnalǵan sport zaly, kıim aýystyratyn bólmeler, dýsh jáne sanıtarlyq toraptar bolady.
Jańa nysan Atyraý oblystyq qurylys, sáýlet jáne qala qurylysy basqarmasynyń tapsyrysy boıynsha salynady. Jobany ázirleýshi bas uıym — «Avangard OK» JShS. Alaıda qurylys jumysy naqty qashan bastalatyny belgisiz.
— Qazir eski jataqhana ǵımaratyn buzyp, onyń ornyna zamanaýı talaptarǵa saı jańa stýdentter úıin salý jobasy ázirlenip, memlekettik saraptamanyń qaraýynda jatyr. Memlekettik saraptamanyń oń qorytyndysy alynǵannan keıin qurylys jumystaryn bastaý josparlanyp otyr, — dep málimdedi basqarma.
Aıta keteıik, qurylys jumystary memlekettik ınvestıtsııalar esebinen júzege asady. Jalpy joba quny 7 mlrd teńgege jýyqtaıdy.
Eske salaıyq, ótken jyly joǵary oqý ornynyń apatty dep tanylǵan jataqhanasynyń bir bóligi qulap qalǵan edi.
Buǵan deıin Parlament Májilisiniń jalpy otyrysynda depýtat Nurgúl Taý jataqhana oryndaryn bóletin ulttyq tsıfrlyq platformany qurýdy usynǵanyn jazǵan edik.
