Atyraýda 90 jastaǵy zeınetkerdiń 6 mln teńgesin alǵan alaıaq sottaldy

ATYRAÝ. KAZINFORM – Atyraýda alaıaq 90 zeınetkerdiń 6 mln teńgesin aldap alǵan. Sot kýrer arqyly áreket etken alaıaqty 2 jyl 8 aıǵa bas bostandyǵynan aıyrýǵa úkim shyǵardy.

Atyraý oblystyq Polıtsııa departamentiniń baspasóz qyzmetinen málim etkendeı, oqıǵa 29 mamyrda tirkelgen.

– Belgisiz er adam 1935 jylǵy qarııaǵa telefon shalyp, ózin quqyq qorǵaý organynyń qyzmetkeri retinde tanystyrǵan. Qarııanyń qyzyn jol-kólik oqıǵasyna kináli dep sendirgen. Jaǵdaıdy «retteý» úshin iri kólemde aqsha talap etip, arnaıy kýrer jiberiletinin aıtqan. Qarııa qorqynysh pen ýaıymǵa salynyp, úıine kelgen beıtanys adamǵa 6 mln teńge berip jibergen, - dep habarlady departamenttiń baspasóz qyzmeti.

Jábirlenýshi arada 10 kún ótken soń polıtsııaǵa atalǵan oqıǵaǵa qatysty shaǵym túsirgen. Zeınetkerdiń shaǵymyna baılanysty Atyraý oblystyq Polıtsııa departamenti kıberqylmysqa qarsy is-qımyl basqarmasynyń qyzmetkerleri jedel-izdestirý sharasyn júrgizgen.

– Arnaıy júrgizilgen is-sharanyń nátıjesinde kýrer retinde áreket etken 1994 jylǵy er adam ustaldy. Onyń «ıAndeks» qosymshasy arqyly kýrerlik qyzmet atqaratyny anyqtaldy. Kýrer tapsyrysqa sáıkes 6 mln teńgeni basqa adamǵa jetkizgenin aıtty. Polıtsııa qyzmetkerleri kýrer arqyly áreket etip, zeınetkerdiń aqshasyn ıemdengen kúdikti retinde Qyzylqoǵa aýdanynyń 2000 jylǵy turǵynyn qolǵa túsirdi, - dep málim etti departamenttiń baspasóz qyzmeti.

Kúdikti kinásin tolyq moıyndaǵan. Sot úkimimen kúdiktige 2 jyl 8 aıǵa bas bostandyǵynan aıyrý týraly jaza taǵaıyndaldy.

– Beıtanys nómirden túsken qońyraýǵa, ózin «polıtsııa qyzmetkeri» dep tanystyrǵandarǵa senbegen jón. ⁠Kúmán týdyrǵan jaıt týraly 102 nómirine jedel habarlaý qajet, -dep málimdedi departamenttiń baspasóz qyzmeti.

Eske sala ketelik, budan buryn Atyraýda kásipkerden 2 mln teńge bopsalaǵan eki kúdikti qamaýǵa alynǵanyn jazǵan edik.