Atyraýda 90 jastaǵy qarııa týǵan ulynan zorlyq-zombylyq kórgen
ATYRAÝ.KAZINFORM– Qyzylqoǵa aýdany Saǵyz aýylynda 90 jastaǵy qartqa óz balasy uzaq ýaqyt boıy zorlyq-zombylyq kórsetip kelgen.
Aldyn ala málimet boıynsha, týǵan uly qart ákesin úıdiń bir bólmesine qamap, onyń erkin shyǵýyna shekteý qoıǵan. Sondaı-aq ol ákesine tamaq pen sý bermeı, qol-aıaǵyn baılap tastaǵan. Qart adam múmkindik týǵan sátte úıden qashyp ketken. Keıin ol jaqyn týysynyń úıine baryp, bolǵan jaıtty baıandaǵan.
Atyraý oblystyq polıtsııa departameti uryp-soǵý baby boıynsha qylmystyq is qozǵady.
— Qazirgi ýaqytta oqıǵanyń barlyq mán-jaıyn jan-jaqty, tolyq jáne obektıvti anyqtaýǵa baǵyttalǵan qajetti tergeý áreketteri júrgizilýde. Ózge aqparat tergeý múddesine sáıkes jarııalaýǵa jatpaıdy, - dep málimdedi departamenttiń baspasóz qyzmeti.
Buǵan deıin Atyraýda jyl basynan beri januıasynda janjal shyǵarǵan 156 adam qamalǵanyn jazǵan edik.
