Atyraýda 9 jastaǵy jasóspirimdi uryp-soǵý deregi boıynsha qylmystyq is tirkeldi

ATYRAÝ. KAZINFORM – Atyraý qalasyndaǵy aýlalardyń birinde 9 jastaǵy jasóspirimge qatysty jasalǵan zorlyq-zombylyq faktisi boıynsha qylmystyq is qozǵaldy. Bul týraly oblystyq polıtsııa departamenti habarlady. 

Vedomstvonyń málimetinshe, atalǵan oqıǵa boıynsha 21 jastaǵy kúdikti anyqtalyp, qamaýǵa alyndy.

– Jábirlenýshi jeńil dene jaraqatyn alǵan. Qazirgi ýaqytta oǵan psıhologııalyq kómek kórsetilip jatyr. Ózge aqparat tergeý múddesine baılanysty jarııalaýǵa jatpaıdy, - delingen Polıtsııa departamentiniń resmı habarlamasynda. 

Sonymen qatar jáberlenýshi jedel járdem brıgadasymen Atyraý oblystyq balalar aýrýhanasynyń travmpýnktine jetkizilgen.

– Patsıenttiń shaǵymdary: bas aınalý, sol jaq kóz mańyndaǵy aýyrsyný. Jaraqat er adamnyń soqqysynan keıin paıda bolǵany belgili boldy, – dep habarlady oblystyq densaýlyq saqtaý basqarmasy.

Dárigerler naýqasqa kompıýterlik tomografııa jasap, bas súıek-mı qurylymdarynda ózgeris anyqtamaǵan. Qorytyndy boıynsha, balada sol jaq kóz mańyndaǵy jumsaq tinderdiń soǵylýy tirkelgen.

Eske sala keteıik, buǵan deıin elimizde qylmys sany 13%-ǵa tómendegenin jazǵan bolatynbyz. Onyń ishinde Qazaqstanda kisi óltirý, qaraqshylyq, tonaý, buzaqylyq, urlyq jáne mal urlyǵy azaıǵan.