Atyraýda 9 jastaǵy qyzdan jyn shyǵarmaq bolǵan emshi jaýapqa tartylady

ASTANA. KAZINFORM – Atyraýda Keıqýat Ospanov esimdi azamat áleýmettik jelidegi paraqshasynda ıslam medıtsınasymen emdeıtinin ashyq kórsetip, seanstaryn paraqshasyna júktegen. Qazir emshige qatysty is tergelip jatyr. Bul týraly Bas prokýrordyń orynbasary Ǵalymjan Qoıgeldıev málim etti.

- Bul is boıynsha tekserý júrip jatyr. Qazir emshini ákimshilik jaýapkershilikke tartý máselesi qarastyrylýda, - dep qysqa qaıyrdy Ǵalymjan Qoıgeldıev Májilis otyrysynan keıin ótken baspasóz máslıhatynda. 

Sondaı-aq BAQ ókilderi emshiniń nelikten qylmystyq jaýapqa tartylmaıtyny týraly surady. 

- Meniń bilýimshe, balanyń ata-anasynan shaǵym bolǵan joq, - deıdi ol. 

Eske sala ketsek, áleýmettik jelide ıslam medıtsınasymen jyn shyǵarǵan emshi Keıkýat Ospanovtyń áreketi talqyǵa túsip jatqany jaıly habarlaǵan edik. 

Belgili bolǵandaı, balalardan jyn shyǵaratyn emshi buryn Atyraýdaǵy meshittiń kúzetshisi bolǵan.

Sondaı-aq, Atyraý oblystyq Polıtsııa departamentiniń baspasóz qyzmeti áleýmettik jelide taraǵan vıdeo tekserilip jatqanyn habarlady.

Keıin balalardyń quqyǵyn qorǵaý komıtetinen jyn shyǵaratyn emshide bolǵan 9 jastaǵy qyz psıhologııalyq kómek alyp jatqanyn málim etildi.