Atyraýda 9 temirjol vokzaly jańartylyp jatyr
ATYRAÝ. KAZINFORM – Óńirdiń ınfraqurylymyn jańǵyrtý baǵdarlamasy aıasynda 9 temirjol vokzaly jańartylyp jatyr. Onyń ishinde altaýynyń qurylysy bıyl birinshi jartyjyldyqta aıaqtalady dep josparlanyp otyr. Olardyń biri – Atyraý qalasynyń temirjol vokzaly. Tarıhı ǵımarat 50 jyldan astam ýaqyt óńir jolaýshylaryna qyzmet kórsetip keledi. Onyń jalpy aýdany – 3744,8 sharshy metr, dep habarlaıdy Óńirlik kommýnıkatsııalar qyzmeti.
Jańǵyrtý jumystary Atyraý qalasynda, Maqat aýdany, Jamansor jáne Muqyr eldi mekenderinde júrip jatyr. Al Isataı men Qurmanǵazy aýdandary, Dossor, Aqqystaý, Saǵyz aýyldarynda eski ǵımarattardyń ornyna jańa vokzaldar salynyp jatyr. Jańartý jumystary aıasynda ǵımarattardyń qasbetteri jańartylyp, ınjenerlik jáne sanıtarlyq jeliler aýystyrylady, jańa jaryqtandyrý jáne navıgatsııalyq júıeler ornatylady.
Sondaı-aq kedergisiz orta qalyptastyrýǵa erekshe kóńil bólinip otyr. Ǵımarattarda pandýstar, zamanaýı sanıtarlyq toraptar, ana men bala bólmeleri, sondaı-aq múmkindigi shekteýli azamattarǵa arnalǵan demalys aımaqtary qarastyrylǵan. Aldaǵy ýaqytta vokzaldarǵa kótergish platformalar ornatyp, qozǵalysy shekteýli azamattarǵa arnalǵan qosymsha ınfraqurylymmen jabdyqtaý josparlanyp otyr.
Atyraý oblysy jolaýshylar kóligi jáne avtomobıl joldary basqarmasynyń bólim basshysy Danııar Garıfýllanyń aıtýynsha, Atyraý temirjol vokzaly kúnine 1300-den astam jolaýshyny qabyldaıdy.
– 2025 jyldyń qyrkúıek aıynan bastap Memleket basshysynyń tapsyrmasyna sáıkes «Qazaqstan temir joly» UK» AQ oblys ákimdigimen birlesip óńirdegi 9 vokzaldy jóndeý jáne jańǵyrtý jumystaryn júrgizip jatyr. Osy jyldyń birinshi jartyjyldyǵynda Saǵyz, Maqat, Dossor, Aqqystaý, Isataı jáne Ganıýshkıno vokzaldaryndaǵy jumystar aıaqtalady dep josparlanǵan. Qalǵan nysandar ekinshi jartyjyldyqta paıdalanýǵa beriledi, – dedi D.Garıfýlla.
Aıta keteıik, temirjol vokzaldarynyń basym bólimi 2004 jyly kúrdeli jóndeýden ótken.