Atyraýda 86 myń gektar aýmaqta shegirtkege qarsy ý sebiledi
ATYRAÝ. KAZINFORM – Atyraý oblysynda 86 myńnan astam gektar aýmaqta shegirtkege qarsy hımııalyq óńdeý júrgiziledi.
Agroónerkásiptik keshendegi memlekettik ınspektsııa komıteti Atyraý oblystyq aýmaqtyq ınspektsııasynyń bólim basshysy Ábıla Qazıevanyń málimetinshe, óńirde úıirli shegirtkeniń 2 túriniń tabıǵı oshaǵy bar.
«Bıyl Atyraý oblysynda azııalyq jáne ıtalıandyq shegirtkege qarsy 86210 gektar aýmaqta hımııalyq óńdeý júrgizý josparlanyp otyr. Onyń ishinde 28110 gektar azııalyq shegirtkege, 58100 gektar ıtalıandyq prýsqa qarsy óńdeledi. Hımııalyq óńdeý jumystaryn «AvıaSıla» JShS-niń 3 deltaplanymen áýeden, «Magtoksın» JShS-niń 1 aerozoldy gazogenerator jáne 1 jeldetkish búrikkishimen óńdeledi», - deıdi Ábıla Qazıeva.
Onyń málimetinshe, bıyl azııalyq shegirtkege qarsy «Dıýron», al, ıtalıandyq prýs túri úshin «Karat sýper», «Tıametrın», «Gýnsıao» jáne «Koıra» pestıtsıdteri qoldanylady.
«Bul pestıtsıdter ákelinip, josparlanǵan aýmqqa bólindi. Saıaq shegirtkelerge qarsy 10095 gektar, shalǵyn kóbelegine qarsy 1600 gektar aýmaqty hımııalyq óńdeý josparlanyp otyr. Osy maqsatqa jergilikti bıýdjetten qajetti qarjyt bólinip, áleýetti qyzmet kórsetýshiler anyqtalyp tıisti kelisimsharttar jasalýda», - dep málim etti Ábıla Qazıeva.
Qazir shegirtkege qarsy shuǵyl áreket etý shtabtar qurylǵan. «Respýblıkalyq fıtosanıtarııalyq dıagnostıka jáne boljamdar ádistemelik ortalyǵy» RMM fılıaly mamandarynyń zertteý nátıjesine sáıkes, shegirtke dernásilderiniń jappaı shyǵýy 20 mamyrǵa sáıkes keledi. Qyzmet kórsetýshi mekemeler hımııalyq óńdeýdi sol kezde bastaıdy.
«Sharýa qojalyǵynyń ıeleri QR Ósimdikterdi qorǵaý týraly zańynyń 14-5 babyna sáıkes, ózderine berilgen jerde zııandy jáne asa qaýipti zııandy aǵzalarǵa qarsy zertteý, fıtosanıtarııalyq is-sharalardy óz qarajaty esebinen júrgizýge mindettelgen. Eger zııankesterden keletin zııan mólsheri ekonomıkalyq zııandylyq sheginen asqan jaǵdaıda QR Ákimshilik quqyq buzýshylyq týraly kodekstiń 403-babyna sáıkes ákimshilik jaýapkershilikke tartylady», - dedi Ábıla Qazıeva.
