Atyraýda 80-nen astam muǵalimge 11 mln teńgeden astam ótemaqy tólendi

ASTANA. KAZINFORM – Atyraý qalasynyń prokýratýrasy azamattardyń eńbek quqyqtaryn qorǵaý baǵytynda júrgizgen jumys nátıjesinde 80-nen astam pedagogtyń konstıtýtsııalyq quqyqtary qalpyna keltirildi.

Taldaý barysynda bilim berý uıymdarynyń ujymdyq sharttarynda zeınet jasyna jetken qyzmetkerlerge aldyn ala habardar ete otyryp, bir laýazymdyq jalaqy mólsherinde ótemaqy tóleý qarastyrylǵany anyqtaldy. Alaıda birqatar mektepter men balabaqshalarda bul talap oryndalmaǵan.

- Prokýrorlyq qadaǵalaý aktisi negizinde 11 mln teńgeden astam ótemaqy tólenip, qyzmetkerlerdiń quqyqtary tolyq kólemde qalpyna keltirildi.

33 laýazymdy tulǵa qatań tártiptik jaýapkershilikke tartyldy, - delingen baqylaýshy organnyń dereginde.

Qala prokýratýrasy áleýmettik salada zańdylyqty qamtamasyz etý jáne azamattardyń quqyqtaryn qorǵaý baǵytynda jumysyn jalǵastyrady.

Aıta keteıik, buǵan deıin «Araltuz» qyzmetkerge 5 mln teńge moraldyq ótemaqy tóleıtini týraly habarlandy.