Atyraýda 8 veterınarııalyq stantsııa biriktirilmek

ATYRAÝ. KAZINFORM — Atyraý oblysynda qala jáne aýdandardaǵy 8 veterınarııalyq stantsııa biriktiriledi. Bul shara 2026-2030 jyldarǵa arnalǵan jekeshelendirý jospary aıasynda júzege asady.

Jyl sońyna deıin biriktirý arqyly Atyraý oblystyq veterınarııalyq stantsııasy KMK qurý josparlanǵan. Atyraý oblystyq aýyl sharýashylyǵy jáne jer qatynastary basqarmasynyń basshysy Amangeldi Salamattyń aıtýynsha, bul ózgeris mamandardyń jumysyna keri áser etpeıdi.

— 2026 jyldyń aıaǵyna deıin qaladaǵy jáne aýdandardaǵy veterınarııalyq stantsııalardy biriktirý josparlanýda. Mundaı tájirıbe respýblıkanyń basqa oblystarynda da bar. Mal dárigerleriniń sany qysqarmaıdy, jumystary saqtalady. Bıyldyń ózinde mal dárigerleriniń jalaqysy 20 paıyzǵa ósti. Ákimshilik qyzmetkerler qysqarýy múmkin. Biryńǵaı esep pen kadr júıesin ońtaılandyrý baǵytynda jumystar júrgiziledi, — dedi basqarma basshysy.

Qazirgi ýaqytta óńirdegi veterınarııalyq stantsııalarda 300-ge jýyq maman eńbek etedi.

Budan bólek 2026 jyly taǵy birneshe uıymǵa qatysty jekeshelendirý jáne ońtaılandyrý jumystary josparlanǵan. Atyraý oblystyq memlekettik satyp alý jáne kommýnaldyq menshik basqarmasy bergen málimetke súıensek, oblystyq balalar stomatologııalyq emhanasy satý josparlanyp otyr, «Beıbarys-Atyraý» hokkeı klýbyn senimgerlik basqarýǵa berý kózdelgen. Óńir bıligi búginde atalǵan baǵyttar boıynsha uıymdastyrý jumystaryn júrgizilip jatqanyn málimdedi.

Osyǵan deıin Atyraý oblysy ákimdigi «Atyraý» oblystyq fýtbol komandasyn satýǵa shyǵarǵanyn, klýb jumysyn júrgizýge nıet bildirgen kásipkerlerge quny keminde 1 mlrd teńge bolatyn fýtbol akademııasyn salý týraly talap qoıǵanyn jazǵan edik.