Atyraýda 8-synyp oqýshysyn top bolyp soqqyǵa jyqqandarǵa qylmystyq is qozǵaldy
ATYRAÝ. KAZINFORM — Atyraý qalasynda segizinshi synyp oqýshysynyń soqqyǵa jyǵylýyna baılanysty qylmystyq is qozǵaldy. Oqıǵa áleýmettik jelide keńinen talqylanyp, qoǵamnyń nazaryn aýdardy.
Jasóspirimniń anasynyń aıtýynsha, 29 mamyr kúni onyń ulyn aldap páterge shaqyryp, birneshe saǵat boıy ustap otyrǵan.
— Balamdy saǵat 15:00 shamasynda páterge kirgizip, keshki 18:00–ge deıin shyǵarmaǵan. Sol ýaqyt aralyǵynda toǵyz jasóspirim kezek-kezek uryp-soqqan, — deıdi ol.
Sondaı-aq áıel oqıǵadan keıin janjalǵa qatysýshylardy óz kúshimen izdeýge májbúr bolǵanyn, al sot-medıtsınalyq saraptama birden taǵaıyndalmaǵanyn málimdedi.
Atyraý oblystyq polıtsııa departamentiniń dereginshe, quqyqbuzýshylyqqa qatysy bar barlyq jasóspirim anyqtalǵan.
— Atyraý qalasy polıtsııa basqarmasynyń qyzmetkerleri quqyqbuzýshylyqqa jol bergen 15-16 jastaǵy barlyq tulǵany anyqtap, zańdy ókilderimen birge polıtsııa basqarmasyna jetkizdi. Atalǵan derek boıynsha qylmystyq is qozǵalyp, tergeý amaldary bastaldy, — dep habarlady departamenttiń baspasóz qyzmeti.
Polıtsııanyń málimetine sáıkes, quqyqbuzýshylyq jasaǵan jasóspirimder ishki ister organdarynyń profılaktıkalyq esebine qoıyldy. Jınalǵan materıaldar kámeletke tolmaǵandardyń isi jónindegi komıssııanyń qaraýyna joldanady.
Al olardyń ata-analary bala tárbıesine tıisinshe kóńil bólmegeni úshin ákimshilik jaýapkershilikke tartylǵan.
Qazir oqıǵanyń barlyq mán-jaıyn anyqtaýǵa baǵyttalǵan tergeý amaldary jalǵasyp jatyr.
Jalpy elde 3 myńnan astam bala polıtsııanyń esebinde tur.
