Atyraýda 8 laýazymdy tulǵa tártiptik jaýapkershilikke tartyldy

ATYRAÝ. KAZINFORM – Atyraý oblysynda «Bızneske jol» jobasy aıasynda 1396 kásipkerdiń quqyǵy qorǵalǵan. Olarǵa 554 mln teńgeden astam bereshegi ótelip otyr.

Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Nurlan Jahınniń aıtýynsha, «Bızneske jol» jobasy byltyrdan beri iske asyrylyp keledi.

«Bul joba kásipkerlerdiń jumysyna kedergi keltiretin túıtkildi máselelerdi oń sheshýge baǵyttalyp otyr. Jergilikti departament qyzmetkerleri bıznes salasynyń, ásirese, shaǵyn jáne orta kásipkerlik ıelerimen kúndelikti kezdesýler ótkizip júrmiz. Olardyń qalypty jumys isteýine kimniń jáne qandaı máseleniń kedergi keltiretinin anyqtaımyz. Osyndaı jumystardyń yqpalymen sheshimin tapqan máselelerdiń nátıjesinde 8 laýazymdy tulǵa tártiptik jaýapkershilikke tartyldy. Jyl basynan beri «Bızneske jol» jobasy aıasynda 1396 kásipkerdiń quqyǵy qorǵaldy. Olarǵa 554 mln teńgeden astam bereshegi óteldi», -dep habarlady Nurlan Jahın.

Onyń málimetinshe, «Atyraý oblysy Sý Arnasy» KMK jáne oblystyq densaýlyq saqtaý basqarmasyna qarasty 13 medıtsınalyq mekemeniń tarapynan kásipkerlerge taýarlar men qyzmetter úshin tıisti qarjysyn tólemeý deregi anyqtalǵan.

«Departament qyzmetkerleri osyǵan baılanysty qajetti sharalarly qoldandy. Sonyń nátıjesinde atalǵan mekemelerden 158 kásipkerlik sýbektisine jalpy somasy 444 mln 228 myń 688 teńge tólendi», -dep málim etti Nurlan Jahın.

Eske sala ketelik, budan buryn Atyraý oblysynda 85 laýazymdy tulǵaǵa 14,5 mln teńge aıyppul salyndy.