Atyraýda 8 adam jumysta júrip qaıtys bolǵan

ATYRAÝ. KAZINFORM — Byltyr Atyraýda jumys barysynda 54 jazataıym oqıǵa tirkelgen. Onyń toǵyzy 2024 jyly bolyp, byltyr iske núkte qoıylǵan.

Jumys barysynda bolǵan oqıǵa saldarynan 59 adam aýyr dene jaraqatyn alyp, 8 jumysshy qaıtys bolǵan. Anyqtalǵan derekterdiń 36-sy eńbek qaýipsizdigin durys uıymdastyrmaý men jumys berýshi tarapynan ishki baqylaýdyń álsizdiginen bolǵan. Al 18 jaǵdaı kerisinshe, zardap shekkenderdiń qaýipsizdik talaptaryn saqtamaýyna baılanysty. Atalǵan faktiler boıynsha 48 qylmystyq is aıaqtalyp, qalǵan 6 is boıynsha áli de tergeý júrip jatyr.

— Mundaı oqıǵalar munaı-gaz jáne qurylys salasynda jumys isteıtin mekemelerde jıi kezdesedi. Únemi túsindirý jumystaryn júrgizemiz. Profılaktıkalyq jáne jospardan tys tekseris bolady. Jazataıym oqıǵa anyqtalǵan kezde akt jasalyp, mindetti túrde quqyq qorǵaý organyna jiberiledi, — dedi Atyraý oblysy boıynsha Eńbek ınspektsııasy departamentiniń eńbek qaýipsizdigin baqylaý bóliminiń basshysy Islam Igamberdıev.

Jazataıym oqıǵalardyń aldyn alý maqsatynda búginde 226 óndiristik nysan eńbek jaǵdaılary boıynsha attestatsııadan ótken. Qaýipsizdik talaptaryna salǵyrt qaraǵan 33 mekemege 12 mln teńgeden astam aıyppul salyndy. Sóıtip, qoldanystaǵy kásiporyndardy mindetti saqtandyrýmen qamtý deńgeıi 75,6 paıyzdy qurady. Al óndiristegi jazataıym oqıǵalardy jasyrǵan 17 uıym 3 mıllıon 342 myń teńge kóleminde aıyppul arqalady.

Osyǵan deıin Túrkistanda Jasyl aımaqtyń 550-ge jýyq jumysshysynyń jalaqysy ýaqtyly tólenbegenin jazǵan edik.