Atyraýda 72 mlrd teńge bólingen nysandar qurylysy merziminen nege keshiktirildi
ATYRAÝ. KAZINFORM – Atyraý oblysynda qurylysy merziminen keshiktirilgen 81 nysan bar. Olardyń qurylysyn júrgizýge 72 mlrd teńge bólingen.
Sybaılas jemqorlyqqa qarsy is-qımyl agenttigi Atyraý oblystyq departamentiniń basshysy Erulan Serikqalıevtiń aıtýynsha, qurylys salasynda alańdatatyn túıtkil bar.
– Eń basty túıtkil – áleýmettik nysandar men joldardyń qurylysyn júrgizýdegi sapasyzdyq. Departament qyzmetkerleri qurylysy uzaqqa sozylǵan nysandarǵa taldaý júrgizdi. Taldaý kezinde nysandar qurylysynyń keshigýine sebep bolatyn birneshe sybaılas jemqorlyq táýekeli anyqtaldy.
Birinshiden, tapsyrys berýshiler tarapynan tıisti baqylaý bolmaǵan.
Ekinshiden, tehnıkalyq qadaǵalaý jasalmaǵan.
Úshinshiden, merdigerlik kompanııalar jáne memlekettik tapsyrys berýshiler arasynda úlesi bar.
Tórtinshiden, merdigerler arasyndaǵy karteldik sóz baılasý, jobalaý-smetalyq qujattamany túzetý, qosymsha bıýdjet qarajatyn bólý deregi baıqaldy.
Besinshiden, tıisti lıtsenzııasy joq merdigerlerdiń jumystardy oryndaýy.
Altynshydan, qurylys jobalaryna jaýapty burynǵy sheneýnikterdiń keıinnen kelisimshart jasalǵan merdigerlik mekemelerge jumysqa ornalasý jaǵdaıyna erekshe nazar aýdaryldy», - deıdi Erulan Serikqalıev.
Onyń deregine súıensek, qazir Atyraý oblysynda qurylysy keshiktirilip, merziminde aıaqtalmaǵan 81 nysan bar. Sondaı nysandardyń jartysynan kóbi Atyraý qalasynda ornalasqan. Bul – 48 nysan.
– Qurylysy keshiktirilgen nysandarǵa 72 mlrd teńge bólindi. Osy kezge deıin 42,5 mlrd teńgeden astamy ǵana ıgerildi. Nysandardyń bári – áleýmettik salaǵa qajetti nysandar. Onyń ishinde 35 turǵyn úı, 32 ınfraqurylymdyq nysan, 4 mádenıet úıi, 3 sport kesheni, 5 mektep pen 2 aýrýhana bar. Áleýmettik salaǵa serpin berer nysandardyń qurylysyndaǵy uzaq kidirister qoǵamnyń alańdaýshylyǵyn týdyryp otyr. Muny sybaılas jemqorlyq pen jaýapty organdardyń áreketsizdiginiń yqtımal kórinisi retinde baǵalaǵan jón, - deıdi Erulan Serikqalıev.
Departament basshysynyń aıtýyna qaraǵanda, jergilikti atqarýshy organdarǵa anyqtalǵan sybaılas jemqorlyq táýekelderin joıý boıynsha usynys engizilip otyr.
Birinshiden, qurylysy aıaqtalǵan, biraq túrli sebeppen qabyldanbaǵan nysandardy anyqtap, túpkilikti sheshimder qabyldaý qajet.
Ekinshisi – kelisimshartta kórsetilgen mindettemelerin oryndamaǵan merdigerlerden turaqsyzdyq aıybyn óndirip alý.
Úshinshiden, negizgi nysandardyń qurylysyn aıaqtaý úshin tenderlik rásimderdi júrgizgen jón.
Tórtinshiden, josyqsyz merdigerlerdi taný týraly talap aryzdardyń berilýin baqylaýdy kúsheıtý kerek.
– Bizdiń usynystarymyzdyń tıimdi tustary bar. Birinshiden, bul sharalar qurylystyń keshiktirilýine jol bermeýdi qamtamasyz etedi. Ekinshiden, bıýdjet qarajatyn tıimdi paıdalanýdy qamtamasyz etýge baǵyttalyp otyr, -dep málim etti Erulan Serikqalıev.
Osylaısha Atyraý qalasyndaǵy Ó. Atambaev atyndaǵy №8 orta mektepte jóndeý jumysynyń sapasyz júrgizilgeni anyqtalyp otyr. Bilim ordasyndaǵy jóndeý jumysy byltyrǵy jyldyń sońynda júrgizilgen.
– Bilim berý mekemelerindegi jóndeý jumystardyń ashyqtyǵy men sapasyn qamtamasyz etý úshin qoǵamdyq monıtorıngti turaqty júrgizýdiń mańyzy zor. Sybaılas jemqorlyqqa qarsy qyzmet eriktileri sondaı monıtorıngtiń biri Ó. Atambaev atyndaǵy №8 mektepte 2024 jyldyń sońynda oryndalǵan jóndeý jumystarynyń sapasyn baǵalaý úshin júrgizdi. Monıtorıng kezinde birqatar kemshilik anyqtaldy. Atap aıtqanda, qol jýǵyshtyń ústindegi kafelderdi, taktıldi plıtalardy ornatý, qabyrǵalardy árleý jáne syrlaý sapasyz atqarylǵan. Esik pen eden aralyǵynda shektegishter bolmady. Sonyń saldarynan qabyrǵa búlingen, - dep habarlady departamenttiń baspasóz qyzmeti.
Sondaı-aq, mektep aýmaǵy kógaldandyrylmaǵany anyqtaldy. Bilim ordasynyń keıbir bólmelerindegi esikter, ýnıtaz qaqpaqtary, kireberis esikter men taqtaıshalar synǵan.
– Zań men tártipti saqtaý – óskeleń urpaqty oqytý úshin qaýipsiz jáne jaıly orta qurýdyń mańyzdy shartynyń biri. Osy oraıda bilim berý mekemelerindegi jóndeý jumystarynyń sapasy belgilengen standarttar men talaptarǵa saı bolýy kerek. Sol sebepten, monıtorıng nátıjeleri boıynsha jemqorlyqqa qarsy eriktiler mektep basshylyǵyna anyqtalǵan kemshilikterdi joıý jóninde usynystar berdi. Merdiger kompanııa basshylary eskertýlerdi eskerip, bir aı ishinde joıýǵa ýáde berdi, -dep málim etti departamenttiń baspasóz qyzmeti.
Eske sala ketelik, budan buryn Atyraýda 6 jyl buryn bastalǵan qalashyq qurylysy áli bitpegenin jazǵan bolatynbyz.