Atyraýda 7 jyl buryn bastalǵan 24 turǵyn úı jobasy áli aıaqtalmady
ATYRAÝ.KAZINFORM – Atyraý qalasy Talqaıran aýylynda salynyp jatqan 24 úıdiń qurylysy 7 jylǵa sozylyp ketti. 2019 jyly bastalǵan jumys 2020 jyly tapsyrylý kerek edi. Alaıda áli kúnge halyq ıgiligine berilgen joq.
Osyǵan deıin qurylys materıaldarynyń quny 2-3 esege ósýine baılanysty jobalyq smetalyq qujatqa túzetý engizildi. Keıin baspanalardyń negizgi qurylys jumysy aıaqtalǵannan keıin, sol aýmaqqa ınjenerlik jelilerdiń júrgizilmegeni belgili boldy. 2022 jyly aımaq basshysy Serik Shápkenov «Spýtnık» qalashyǵyndaǵy úılerge baryp, jumysty tezdetý kerektigin tapsyrǵan. Eki jyldan keıin bul jobany antıkor baqylaýǵa aldy.
Atyraý qalasy ákiminiń orynbasary Tilek Mahýov 1045 páterdi alǵashynda 2024 jyly paıdalanýǵa beremiz dese, byltyr da osyndaı jospar aıtyldy.
Jýyqta Atyraý oblysy ákiminiń orynbasary Qaırat Nurtaev Talqaırańdaǵy saqaldy jobaǵa jyl sońyna deıin núkte qoıylatynyn málimdedi. Onyń sózinshe, búginde úılerdi elektrmen, sýmen jáne gazben qamtý máselesi tolyq sheshilgen.
— Sol jerdegi bekitilgen jerge ornalastyrý jobasy boıynsha 70 úı salyný kerek. Onyń 24-i salynyp tur. 19 úıdiń qurylysy tolyqtaı aıaqtaldy. Qalǵan úıde ishki árleý jumystary júrip jatyr.Bul jumys osy jyly bitedi. Qazirgi ýaqytta qalǵan másele káriz jelisine qatysty. Ótken jyly bul jumysty aıaqtaý josparlanǵan, alaıda jobaǵa sol aýmaqtaǵy basqa eldi mekenderdi qosyp, ózgeris engizdik. Káriz jelisin osy jyldyń birinshi jarty jyldyǵynda tolyqtaı júrgizemiz, — dedi Qaırat Nurtaev.
Jalpy jospar boıynsha 24 úıdiń aýmaǵyna 22 shaqyrym káriz jelisi tartylý kerek. Bul jumys tek byltyr bastalǵan.
Aıta keteıik, qazirgi ýaqyta Atyraý oblysynda 45 myńǵa jýyq azamat turǵyn úı kezeginde tur.
Jýyqta Qazaqstanda 2026 jyly turǵyn úı baǵasy qalaı ózgeretini týraly jazǵan edik.
