Atyraýda 7 jasar qyzdyń ólimi: Apellıatsııa úkimdi ózgerissiz qaldyrdy

ATYRAÝ.KAZINFORM — Byltyr Atyraý qalasyndaǵy Jeńis saıabaǵynda kishkentaı qyzdyń ústine qulaǵan músindi jasaǵan merdiger uıym basshysynyń isin apellıatsııalyq sot qaraýdan bas tartty. Sot otyrysynda aıyptalýshynyń qorǵaýshylary músinniń sol kezdegi qala ákimi Qaırat Orazbaev pen onyń orynbasary Ulyqbek Tinálıevtiń tapsyrmasymen ornatylǵanyn aıtty.

Olardyń sózinshe, taraptar keıin kelisimshartqa otyryp, merdiger nysanǵa bir jyldyq kepildik bergen. Al daıyn músindi tuǵyrǵa karantın kezinde basqa merdiger kompanııa ornatqan.

— Іrgetasty ornatqan Baımuqashev emes. Basqa azamattar jasady. Olarǵa zańdy baǵa berilmegen. Ákimdik ókilderine jeke-jeke quqyqtyq baǵa berilmegen. Kelisimshart boıynsha meniń qorǵaýymdaǵy azamat músindi postamentke qoıý kerek bolatyn. Al postamentti sýbmerdigerler qoıǵan. Tapsyrys berýshilermen Baımuqashv kelisim shartqa otyryp, 12 aı kepildik beredi. Kepildik odan keıin tapsyrys berýshilerge aýysady. Bir sózben aıtqanda, Baımuqashev músindi jasap bergen, — dedi sottalýshynyń advokaty Sáken Júnisbekov.

Sot otyrysyna jábirlenýshi taraptyń ókilderi de qatysty. Olar bul oqıǵaǵa bıýst avtory — músinshiniń de tikeleı kinási bar dep esepteıdi. Sondaı-aq, olar iste esimderi atalǵan ákimdik ókilderine qatysty shyǵarylǵan jeke qaýlynyń sheshimi týraly habar almaǵanyn aıtty.

— Bul músinder Atyraý qalasynyń sol kezdegi ákimi Qaırat Orazbaev pen onyń orynbasary bolǵan Ulyqbek Tinálıevtyń aýyzsha kelisimi aıasynda zańdy óreskel buzyp qoıylǵan. Postamentti qoıýǵa sheshim qabyldaǵan Orazbaev jaýapty. Oǵan jáne Atyraý qalasy ákimdiginiń qyzmetkerlerine qatysty birinshi satylyq sotynyń jeke qaýlysy shyǵaryldy. Biraq qandaı sheshim qabyldanǵany týraly bizge eshkim eshteńe aıtapady. Qylmystyq is qozǵaldy ma, qozǵalmady ma bilmeımiz, — dedi jábirlenýshi taraptyń advokaty Aıbar Qosymbaev.

Eske salaıyq, ótken jyly Jeńis saıabaǵynda bıýst ústine qulap, 7 jasar qyz kóz jumǵan edi.

Atyraý oblystyq polıtsııa departamentiniń baspasóz qyzmeti atalǵan oqıǵaǵa baılanysty qylmystyq is qozǵalǵanyn, tergeý aıaqtalýǵa jaqyn ekenin aıtqan edi. 

Osy oqıǵaǵa merdiger mekemeniń basshysy kináli dep tanylyp, 1 jyl 6 aıǵa bas bostandyǵynan aıyryldy. Jáne oǵan 3 jyl boıy qurylys salasynda jumys isteýge tyıym salyndy. Budan bólek, sottalýshy moraldyq ótemaqy retinde jábirlenýshilerdiń árqaısysyna 10 mıllıon teńgeden tóleýge, em-dom shyǵynyn óteýge mindetteldi.