Atyraýda 661 otbasyna 203,4 mln teńgeniń ataýly áleýmettik kómegi taǵaıyndalǵan

ATYRAÝ. KAZINFORM – Atyraý oblysynda turmysy tómen 661 otbasyna 203,4 mln teńge ataýly áleýmettik kómek taǵaıyndalyp otyr. Bul otbasylarda 3 923 adam bar. 

Óńirlik kommýnıkatsııalar qyzmetiniń málimetinshe, onyń ishinde 487 otbasyndaǵy 3 074 adamǵa shartty aqshalaı kómek berilgen. Bul – eńbekke qabiletti adamy bar otbasylarǵa beriletin ataýly áleýmettik kómek. Al, 179 otbasynda turatyn 879 adamǵa shartsyz kómek usynylǵan. Óıtkeni bul otbasylarda eńbekke qabiletti adam tirkelmegen. 

«Ataýly áleýmettik kómektiń shartty aqshalaı túrin alýshylardyń arasynda jumys isteý belsendiligi joǵary 816 adam bar. Onyń ishinde kómek alýǵa júginý kezinde 405 adam jumys istep júrdi. Jumyspen qamtý ortalyǵynda jumyssyz retinde 128 adam tirkelip turdy. Al, 283 áıel bala kútiminde otyrdy. Jumyssyz júrgen 128 adamnyń 91,4 paıyzy jumyspen qamtý sharalaryna, 22-si turaqty jumysqa, 89-y qoǵamdyq, 6 adam áleýmettik jumysqa jiberilgen», - dep habarlady óńirlik kommýnıkatsııalar qyzmeti. 

Ataýly áleýmettik kómek alýshylar esebindegi 566 otbasynda 1-den 6 jasqa deıingi 1 089 bala bar. Balalarǵa 26,9 mln teńgeniń qosymsha tólemi taǵaıyndalǵan. 

Eske sala ketelik, budan buryn Jylyoı jastary «Jasyl el» baǵdarlamasymen qurylys jumystaryna tartylatynyn habarlaǵan edik.