Atyraýda 6,5 myń turǵynnyń jer salyǵy qaıta esepteldi
ATYRAÝ. KAZINFORM – Atyraýda jer salyǵyn esepteý kezinde ketken sáıkessizdikter anyqtalyp, shamamen 6,5 myń jer paıdalanýshy boıynsha tólem somalary qaıta esepteldi.
Atyraý oblysynyń prokýratýrasy taratqan aqparatqa sáıkes, Atyraý qalasynyń Almaly aýyldyq okrýgindegi birqatar aýmaqta jer salyǵyn esepteý kezinde qoldanylatyn koeffıtsıentterdi anyqtaýǵa qatysty másele bolǵan.
Atap aıtqanda, Bereke aýyly men oǵan qarasty aýmaqtarda, sondaı-aq birqatar baý-baqsha seriktestikteri ornalasqan jerlerde salyq koeffıtsıentterin esepteý kezinde tıisti aýmaqtar eskerilmegen.
Bul jaǵdaı jer ýchaskeleri boıynsha tólenýge tıis jer salyǵynyń somasyn esepteýge áser etken.
Másele «Energetık-5», «Geofızık», «Agrarnık», «Avtomobılıst-selhozrabotnık», «ÝS-99», «Avıator» jáne «Stroıtel Eńbek» baý-baqsha seriktestikteri ornalasqan iri jer alqaptaryn paıdalanýshylarǵa qatysty.
Keıin salyq koeffıtsıentteri zań talaptaryna sáıkes qaıta eseptelip, soǵan baılanysty jer salyǵynyń mólsheri de qaıta qaralǵan.
Nátıjesinde shamamen 6,5 myń jer paıdalanýshy boıynsha eseptelgen salyq somalary zańnama talaptaryna sáıkestendirildi.
Atyraý oblysynyń prokýratýrasy jer qatynastary salasynda azamattardyń quqyqtarynyń saqtalýyna baqylaý jalǵasatynyn málimdedi.
Buǵan deıin prokýratýra Atyraýda gazǵa qosylmaǵan 30 páter 600 mln teńgege satyp alynǵanyn anyqtaǵan edi.
