Atyraýda 600 oryndyq mekteptiń qurylysy 2 jyldan beri toqtap tur
ATYRAÝ.KAZINFORM – Atyraý qalasy «Birlik-2» yqshamaýdanyndaǵy 600 oryndyq mekteptiń qurylysy 4 jylǵa sozylyp ketti.
Bul jumysqa tapsyrys berýshi – oblystyq qurylys, sáýlet jáne qala qurylysy basqarmasy. Qurylys jumysy 2022 jyldyń maýsymynda bastalǵan. 2024 jyly mekteptiń irgetasy otyryp ketkeni anyqtalǵan. Keıin mamandar irgetasqa zeredeleý jumysyn júrgizip, irgetasty kúsheıtý kerek degen sheshim shyǵarǵan. Osyǵan baılanysty jobalyq smetalyq qujatyna ózgeris engizý qajettiligi týyndady.
- Osy jyldyń naýryz aıynda joba memlekettik saraptamadan shyǵý josparlanyp otyr. Bastapqy quny 3 mlrd 100 mln teńge kóleminde boldy. Іrgetasyn kúsheıtý jumystary jasalatyn bolǵandyqtan jáne búgingi baǵalar qoıylatyndyqtan smetalyq quny ózgeriske ushyraıdy,-dedi basqarmanyń bólim basshysy Ernar Qadirbaı.
Qurylys jumysyna «Taraz Qurylys Invest» JShS jaýapty. Ótken jyly memlekettik sáýlet-qurylys baqylaý basqarmasy merdigerdiń qurylys normalarynan aýytqyǵanyn anyqtap, ákimshilik jaýapkershilikke tartyp, aıyppul salǵan. Degenmen atalǵan kompanııa qurylys jumysyn aıaqtaıdy.
- Qazirgi tańda tolyqtaı monolıt quıý jumystary aıaqtaldy. Qabyrǵa qalaý jumystary 40 paıyzǵa aıaqtalyp tur. Sonymen qatar, zerthanalyq qorytyndylarǵa sáıkes irgetasty kúsheıtý jumystaryna daıyndalyp jatyr. Qurylys jumystaryn jyl sońyna deıin aıaqtaý josparlanyp otyr,-dedi basqarmanyń bólim basshysy Ernar Qadirbaı.
Basqarmanyń bergen resmı málimetine súıensek, merdiger mekeme osy ýaqytqa deıin 1,6 mlrd teńgeni ıgergen.
Osyǵan deıin Atyraý halqy 15 jyl kútken kontsert zalynyń qurylysy qalaı júrip jatqanyn jazǵan edik.