Atyraýda 600 myń gektarǵa jýyq jer memleket menshigine qaıtaryldy

ATYRAÝ. KAZINFORM – 2022-2025 jyldar aralyǵynda Atyraý oblysy aýmaǵynda jalpy kólemi 584 myń gektar aýyl sharýashylyǵy jeri memleket menshigine qaıtaryldy. Bul jumys Jalpyulttyq is-sharalar jospary aıasynda júzege asqan.  

Ótken jyl oblysta jalpy aýmaǵy 61,6 myń gektardy quraıtyn 106 jer ýchaskesi memleketke ótkizilgen. Onyń 55,3 myń gektary – jaıylymdyq jer, 2,2 myń gektary – egistik alqap, al 4,1 myń gektary ózge de aýyl sharýashylyǵy maqsatyndaǵy ýchaskeler. 

2026 jylǵa arnalǵan josparǵa sáıkes, Qazaqstan Respýblıkasy Aýyl sharýashylyǵy mınıstrligi bekitken mejege saı óńirde ıgerilmeı jatqan qosymsha 40 myń gektar jerdi memleket menshigine qaıtarý kózdelip otyr.

– Qaıtarylǵan jerlerdi qaıta aınalymǵa engizý jáne aýyl sharýashylyǵy óndirisin damytý baǵytyndaǵy jumystar jalǵasady. Sondaı-aq paıdalanylmaı jatqan jerlerdi anyqtaý jáne olardy zań talaptaryna sáıkes memleket menshigine qaıtarý sharalary turaqty baqylaýda, - dedi oblystyq aýyl sharýashylyǵy jáne jer qatynastary basqarmasynyń bólim basshysy Nazken Óteshova.

Osyǵan deıin mal sharýashylyǵyn júrgizbegen kásipkerlerden jer qaıtaryp alynatyny týraly jazǵan edik.