Atyraýda 6 jyl buryn bastalǵan qalashyq qurylysy áli bitpedi
ATYRAÝ. KAZINFORM — Atyraý qalasynyń Talǵaırań eldi mekeninde 2019 jyly 24 turǵyn úıdiń qurylysy bastalǵan edi. Osy kezge deıin 8 úıdiń ǵana qurylysy aıaqtalǵan.
Atyraý oblysy ákiminiń baspasóz hatshysy Rýslan Jumaǵazıevtiń usynǵan aqparatyna qaraǵanda, Atyraý qalasynyń bas josparyna sáıkes, kópqabatty turǵyn úı salý úshin Talǵaırań eldi mekeninen 62 gektar jer telimi bólingen.
— Talǵaırań turǵyn úıler qurylysynyń egjeı-tegjeıli jospary jasaqtaldy. Soǵan sáıkes 70 turǵyn úı salý josparlanǵan edi. Onyń ishinde 1 080 páterlik 24 turǵyn úıdiń qurylysy bastaldy. Bul úılerdiń aýmaǵy — 56 myń 323 sharshy metr. Qazir bul úılerdiń qurylysy tolyq aıaqtaldy. Ony ınjenerlik-kommýnıkatsııalyq jeli qurylysy aıaqtalǵan soń qoldanysqa berý josparlanyp otyr, — dep habarlady Rýslan Jumaǵazıev.
Onyń málimetinshe, Spýtnık qalashyǵy atalǵan aýmaqta magıstraldy elektr jelisi bar 110/10 kV qosalqy stantsııa qurylysy aıaqtalǵan.
Alańnan tys elektr jelisi tartylǵan. Qazir 24 turǵyn úıge alańishilik elektr jelisin tartýdyń 90 paıyzy atqarylǵan.
— Jańa shaǵynaýdanda magıstraldy gaz qubyrynyń qurylysy AGRS qondyrǵysymen qosa júrip jatyr. Osy kezge deıin gaz jetkizý qubyrynyń, alańnan tys gaz jelisin elektrmen qamtý jumysy aıaqtalyp tur. Qurylysy aıaqtalǵan 24 turǵyn úıdi gazben qamtıtyn jeliniń salynyp bitti, — dep málim etti oblys ákiminiń baspasóz hatshysy.
Munda uzyndyǵy 9,3 shaqyrym magıstraldy sý qubyry tartylyp jatyr. Sý qubyrynyń daıyndyǵy — 95 paıyz.
— Qazir sý jáne káriz qubyryn jetkizý nysanynyń qurylysy aıaqtaldy. Endi uzyndyǵy 22 shaqyrym magıstraldy káriz jelisi salyna bastady. Qaıyrshaqty aýyldyq okrýgine qarasty aýyldar atalǵan káriz jelisine qosylýyna baılanysty jobalaý-smetalyq qujattamaǵa túzetý engizilip jatyr. Osy aıda jobaǵa memlekettik saraptamanyń qorytyndysy alynady, — deıdi ol.
Alaıda jańa shaǵynaýdanda jylý jelisin júrgizý áli tolyq aıaqtalmaǵan.
Máselen, qýaty saǵatyna 99 gkal quraıtyn qazandyqtyń qurylysyna baılanysty jobalaý-smetalyq qujattamasy jasaqtalyp, saraptamaǵa jiberilgen.
Jylý jetkizý jelisi qurylysynyń 25 paıyzy oryndaldy. Alańnan tys jylý jelisin júrgizý aıaqtaldy. Al alańishilik jylý jelisiniń 75 paıyzy júrgizildi.
Qazir avtokólik joly men abattandyrý isi de júrip jatyr. Shaǵyn aýdandaǵy № 1 jáne № 4 kósheden basqasynda astyńǵy iri qabatty asfalt salyndy. Joldyń daıyndyǵy — 60 paıyz.
— Magıstraldyq baılanys jelisiniń 70 paıyzy daıyn tur. Úıaralyq baılanys jelisin júrgizý jer qazý jumysynyń kedergi keltirýine baılanysty toqtatylyp tur, — dep málimdedi ákimniń baspasóz hatshysy.
Eske sala ketelik, byltyr Atyraýda 13,6 mlrd teńge bólingen 7 turǵyn úıdiń qurylysy áli bitpeı turǵanyn jazǵan edik.