Atyraýda 6 jyl buryn bastalǵan 3 sport zaldyń qurylysy bıyl da aıaqtalmady
ATYRAÝ. KAZINFORM — Atyraýda quny 1 mlrd teńgelik «saqaldy» qurylys 6 jyldan beri aıaqtalmaı keledi. Joba aıasyndaǵy jumys bıyl ǵana qaıta jandandy.
Osy jyldyń kóktemine deıin bul jobaǵa jaýapty alǵashqy merdiger mekemelerdiń basshylaryna qatysty qylmystyq is birneshe sot otyrysynda qaralyp, jumys toqtap turdy.
Ol kezde ǵımarattyń negizi salynǵan edi. Keıin ǵımaratqa tehnıkalyq saraptama júrgizilip, jaramdylyǵy týraly qorytynda berilgen. Jobalyq smetalyq qujatyna túzetýler engizilip, qurylys jumysy osy jyldyń sáýirinde basqa merdiger mekemege tapsyryldy.
Bıyl jazda oblystyq qurylys, sáýlet jáne qala qurylysy basqarmasynyń ókilderi joba jyl sońyna deıin aıaqtalatynyn habarlaǵan. Merdiger mekeme basshylyǵy keler jyldyń sáýir aıyna deıin ýaqytymyz bar, kelisimshartta kórsetilgen ýaqytta, ıaǵnı jumysty qujatta kórsetilgen merzimde aıaqtaımyz deıdi.
— Nysan birneshe jyldan beri qaraýsyz turyp qalǵan. Sol sebepti materıaldardyń sapasy talapqa saı emestigi anyqtalyp, basqarmaǵa habarlama berildi. Joba negizinde qaıta buzý jumysy júrgizildi. Búginde sendvıch panelderdi ornatý jumysy júrip jatyr. Jobada qarastyrylmaǵan qosymsha jumys ta shyǵyp jatty. Dánekerleý jumysynyń ulǵaıýyna baılanysty jumys kólemi kóbeıdi, — dedi merdiger mekemeniń ókili Jánibek Dáýletov.
Qazirgi ýaqytta qurylys montajaý jumysynyń 60 paıyzy oryndaldy. Jańadan boı kótergeli otyrǵan sporttyq nysanda kúres, taekvondo, boks jáne krossfıt jattyǵý zaldary qarastyrylǵan. Bul — turǵyndardyń ártúrli sport túrlerimen aınalysýyna múmkindik beretin jan-jaqty jabdyqtalǵan nysandar bolmaq.
Osyǵan deıin balalar sport mektepterine jan basyna shaqqan qarjylandyrý standarty engiziletinin habarlaǵan edik.