Atyraýda 6 mlrd teńgeniń saıabaǵy osy jyly ashylady

ATYRAÝ. KAZINFORM – Atyraý oblysynyń ákimdigi osyǵan deıin quny 6 mlrd teńge bolatyn saıabaqtyń qurylysy 2025 jyldyń sońyna deıin aıaqtalatynyn málimdegen.Alǵashynda qurylys jumysy qarashada qorytyndylanyp, paıdalanýǵa beriýli tıis edi. Alaıda nysan ótken jyly  ashylmady. 

«Ortalyq saıabaqqa otyrǵyzylatyn kóshetterdiń kólemi shaǵyn bolǵandyqtan, qala ákiminiń usynysyna sáıkes olar shyrsha jáne týıa aǵashtaryna aýystyryldy. Qazir aǵash egý jumysy tolyq aıaqtaldy. Nysan boıynsha jalpy qurylys jumystarynyń 99 paıyzy oryndaldy», - dep málimdedi Atyraý oblystyq qurylys, sáýlet jáne qala qurylysy basqarmasy.

Qazirgi ýaqytta teńgerimge berý jumysy júrýde. Sodan keıin ǵana el ıgiligine tapsyrylmaq. Qalalyq park qurylysyna tańdalǵan jer telimi 4,04 gektar aýmaqty qamtıdy. Joba aıasynda saıabaq aýmaǵynda qolaıly mıkroklımat qalyptastyrý maqsatynda sý-jasyl ınfraqurylymnyń negizgi sáýlettik jáne konstrýktıvtik sheshimder ázirlengen. Aýmaqta sándik, qylqanjapyraqty jáne japyraqty aǵashtar, gúldeıtin butalar egilip, gúlzarlarǵa arnalǵan alańdar jasalady.

Sondaı-aq jobada shaǵyn sáýlettik formalar qarastyrylǵan. Olar: mármár tastan jasalǵan oryndyqtar, 4 oryndyqty ústel kesheni, sporttyq trenajerler, velosıped turaqtary, balalar oıyn alańdary. Joba boıynsha 5 fontan salý kózdelgen: «Sarqyrama», «Jaǵalaý», «Keme», «Bulaqtar», «Shatyry bar qurǵaq fontan».

Aıta keteıik, jeltoqsanda Toqaev iri qalalar men oblys ortalyqtaryna jaqyn jerlerde ekosaıabaqtar qurýdy tapsyrma berdi.

Buǵan deıin Atyraýda 6 jyl buryn bastalǵan 3 sport zaldyń qurylysy bıyl da aıaqtalmaıtynyn jazǵan edik.