Atyraýda 6 aılyq sábı mobıldi telefonnyń sım-kartasyn jutyp qoıǵan
ATYRAÝ. KAZINFORM – Atyraýda 6 aılyq sábı abaısyzda mobıldi telefonnyń sım-kartasyn jutyp qoıǵan. Anasy sábıdiń jótelgenine baılanysty jedel járdem stansasyna habar bergen.
Atyraý oblystyq jedel járdem stansasy dırektorynyń orynbasary Nargız Baımoldaevanyń aıtýynsha, dıspetcher bóbektiń anasy men keńes beretin dárigerdi baılanystyrǵan.
«Mundaı jaǵdaıda abyrjymaý qajet. Bul bizdiń stansanyń qyzmetkerlerine de baılanysty qadam. Dıspetcher telefonmen habarlasqan anany dáriger-keńesshiniń pýltine aýystyrǵan. Al, keńesshi dáriger Gúlnáz Qyryqbaeva balanyń týystaryna algorıtm boıynsha «qońyraýdy ustap turý» ádisimen qadamdyq is-qımyl jasaý jóninde keńes berdi. Ol telefon arqyly alǵashqy medıtsınalyq kómek kórsetýdiń ádisterin túsindirdi. Keńesshi dárigerdiń telefonmen aıtqan nusqaýymen týystary sábıdiń tynys alý jolyna túsken bógde zatty shyǵaryp aldy», - deıdi Nargız Baımoldaeva.
Jedel járdem brıgadasynyń qyzmetkerleri shaqyrtý boıynsha oqıǵa ornyna kelip, sábıge medıtsınalyq kómek kórsetken.
Eske sala ketelik, buǵan deıin Atyraý oblysynda 2 jasar búldirshin balabaqshada kózin jaraqattap alǵanyn habarlaǵan edik.
