Atyraýda 6 aıda zańsyz balyq aýlaǵandarǵa 4 mln teńge aıyppul salyndy
ATYRAÝ. KAZINFORM — Atyraý polıtseıleri kún saıyn Jaıyq ózeninde «Amýr» reıdtik is-sharasyn júrgizýdi qolǵa aldy. Zańsyz balyq aýlaý deregimen ustalǵandarǵa salynǵan aıyppul 4 mln teńgeden asty.
Atyraý oblystyq polıtsııa departamenti balyq qorlaryna qol suǵýshylyqqa qarsy kúres bóliminiń ınspektory Maksım Rahmedenovtiń málimetine qaraǵanda, reıd kezinde Qytaıda jasalǵan balyq aýlaý tory tárkilengen. Torǵa túsken tiri balyqtar ózenge qaıta jiberildi.
— Kúndelikti «Amýr» reıdtik tekserý keshki saǵat 19:00–den túngi 01:00–ge deıin júrgiziledi. Bul jumys Jaıyq ózeni men onyń mańyndaǵy ekojúıeni brakonerlik áreketterden qorǵaý, turǵyndardyń qaýipsizdigin qamtamasyz etý maqsatynda qolǵa alyndy. Jyl basynan beri sý aıdynynda zańsyz alyq aýlaýǵa baılanysty 7 qylmystyq is tirkeldi. Ákimshilik quqyq buzýshylyq týraly kodeksiniń talabyn buzyp, balyq túrlerin zańsyz aýlaǵan 189 adamǵa 4 mln teńgeden astam aıyppul salyndy, — dedi Maksım Rahmedenov.
Jaıyq ózenindegi reıdke 8 qyzmetker, 4 avtokólik pen 3 sý kóligi tartylǵan.
Eske sala ketelik, budan «Bekire — 2025» aktsııasy kezinde úsh oblysta brakonerlerge qatysty 33 qylmystyq is qozǵalǵanyn habarlaǵan bolatynbyz.