Atyraýda 6 aıda zańsyz aınalymnan 8 keliden astam esirtki tárkilengen
ATYRAÝ. KAZINFORM – Atyraýda jyl basynan beri esirtkimen baılanysty 106 quqyq buzýshylyq tirkelgen. Zańsyz aınalymnan 8 keliden astam esirtki zattary tárkilengen.
Atyraý oblystyq polıtsııa departamenti esirtki qylmysyna qarsy is-qımyl basqarmasy bastyǵynyń orynbasary, polıtsııa polkovnıgi Roman Ermuhanovtyń aıtýynsha, jyl basynan beri esirtkige qarsy turaqty ımmýnıtetti qalyptastyrý, ony qoldanýdyń densaýlyqqa zııandylyǵyn túsindirý boıynsha 496 profılaktıkalyq is-shara ótkizilgen.
«Jyl basynan beri esirtkiniń zańsyz aınalymyna baılanysty 106 quqyq buzýshylyq deregi tirkeldi. Onyń ishinde esirtki zattaryn zańsyz ótkizýge qatysty 53 derek bar. Al, esirtki quraldaryn asa iri mólsherde zańsyz saqtaýdyń 7 deregi anyqtaldy. Budan bólek, zańsyz jarnama jasaǵany úshin — 2, quramynda esirtki zattary bar, ósirýge tyıym salynǵan ósimdikterdi zańsyz egip-ósirý boıynsha 7 qylmystyq quqyq buzýshylyq áshkerelendi. Bıyl 6 aıda zańsyz aınalymynan 8 keliden astam esirtki zattary tárkilendi. Quqyq buzýshylardan tárkilengen eń iri partııa — 3 keli 436,45 grammdy quraǵan „Alfa PVP“ sıntetıkalyq zaty. Oblys aýmaǵynda 1 fıtolaboratorııanyń jumysy toqtatyldy», — dep habarlady Roman Ermuhanov.
Onyń aıtýyna qaraǵanda, esirtki áleýmettik jeliler men messendjerler arqyly taralady. Sol sebepten, esirtkiniń zańsyz aınalymynyn aldyn alý úshin keshendi profılaktıkalyq jumys kúsheıtilgen. Osy oraıda esirtki týraly zańsyz jarnamasy bar 30 graffıtı sýreti joıylǵan.
Eske sala ketelik, buǵan deıin Atyraýda 74 jastaǵy qarııa úıiniń aýlasyna 117 túp qara sora ósirgenin jazǵan bolatynbyz.
