Atyraýda 5 mlrd teńgeden astam qarjy memleket paıdasyna óndirildi

ATYRAÝ. KAZINFORM — 2025 jyly sot oryndaýshylar 5 mlrd teńgeden astam qarjyny memleket paıdasyna óndirgen. Bul týraly óńirlik kommýnıkatsııalar qyzmetinde ótken brıfıngte oblystyq ádilet departamentiniń basshysy Gúlanda Qystaýbaeva aıtty.

Departament málimetinshe, oblysta 9 memlekettik jáne 72 jeke sot oryndaýshysy qyzmet atqarady. Byltyr 285 myńnan astam atqarýshylyq qujat oryndalyp, onyń 63 myńy naqty júzege asqan. Nátıjesinde jalpy 25 mlrd teńgeden astam qarajat óndirilgen. Jalpy óndirilgen qarajat salyq bereshegi, ákimshilik, azamattyq jáne qylmystyq isterge qatysty. Áleýmettik mańyzy bar alımentter boıynsha 11 myńǵa jýyq qujat oryndaýda. Ótken jyly 272 boryshker QR «Ákimshilik quqyq buzýshylyq týraly» Kodeksiniń 669 babynyń 1 tarmaǵymen ákimshilik jaýapkershilikke tartylǵan. Alıment tóleýden jaltarǵan 8 azamat sottyń úkimimen 1 jyl merzimge bas bostandyǵy shektelgen.

— 2022 jyly alıment boıynsha 8 myńdaı qujat qaralǵan. Sońǵy jyldary bul baǵyttaǵy qujat sany 3 myńǵa artyp otyr. Qazir alıment alýshylar men tóleıtinderdiń arasynda 2005,2006 jyly týǵandar kóbeıdi. Búginde 326 mln teńge óndirilgen. Kórsetkishtiń tómen bolýyna boryshkerlerdiń jumyssyz bolýy áser etedi. Sondaı-aq múlikterin jasyryp júrgender áli de bar, — dedi Gúlanda Qystaýbaeva.

Atqarýshylyq is júrgizýde «Robot sot oryndaýshysy» júıesi iske qosylyp, 20 AEK-ke deıingi bereshekter avtomatty túrde óndirilip jatyr. Bul azamattarǵa jeke sot oryndaýshylarynyń qyzmet aqysyna ketetin shyǵyndy tóletpeıdi.

Sondaı-aq «Taraptar kabıneti» mobıldi qosymshasy engizilip, taraptar atqarýshylyq is materıaldarymen onlaın tanysyp, ótinish berip jáne tólem jasaı alady. Bıyl departament tsıfrlandyrýdy tereńdetý jáne azamattardyń quqyqtaryn qorǵaý baǵytyndaǵy jumystardy jalǵastyrmaq.

Osyǵan deıin Aqtaýda boryshkerlerden 280 mıllıon teńge óndirilgenin jazǵan edik.