Atyraýda 59 jastaǵy azamat 4 kúnnen beri tabylmaı jatyr
ATYRAÝ.KAZINFORM – Atyraý oblysy Maqat aýdanynyń turǵyny Talǵat Nazarov 9 qańtar kúni joǵalyp ketken.
Ol qalaǵa em alý úshin kelipti. Óıtkeni burynnan epılepsııa dertimen aýyratyn kórinedi. 9 qańtar kúni shamamen saǵat 13:30-da Kókarna aýylyndaǵy qyzynyń úıinen shyǵyp ketip, qaıta oralmaǵan. Týystary sol mańdaǵy beınebaqylaý kameralary arqyly onyń Jaıyqtyń jaǵasymen jaıaý ketip bara jatqanyn anyqtaǵan. Kelesi kúni jaǵalaý boıynan bas kıimi men telefony tabylypty.
- Atyraý qalasynyń aýmaǵynda 59 jastaǵy er adamnyń iz-tússiz joǵalý deregine qatysty jedel-izdestirý sharalary jalǵasyp jatyr. Krımınaldyq polıtsııa bólinisteriniń málimetine sáıkes, er adamnyń izderi Jaıyq ózeniniń mańynan anyqtalyp, jeke zattary tabylǵandyqtan TJD kúsh-quraldary jumyldyryldy, - dedi oblystyq PD baspasóz hatshysy Meıirim Erdaýlet.
Polıtsııa taratqan málimetke sáıkes, er adamnyń boıy 170-175 santımetr shamasynda, dene bitimi ortasha. Ústinde qara tústi kúrte men shalbar bolǵan.
Joǵalǵan azamattyń týystary izdeýge kınolog mamandardy tartyp, ózen mańynda turatyn azamattardyń úılerindegi beınekemalarda qandaı da bir málimet bolsa, bólisýdi suraıdy.
Aıta keteıik, biz osyǵan deıin Atyraý oblysynda joǵalyp ketken otbasy músheleriniń denesinen pyshaq izderi anyqtalǵanyn jazǵan edik.